Kepala Menteri deka bejadi Pengerami Nasih Tanah Projek Jematan Batang Paloh kena 22 Ogos
KUCHING: Kepala Menteri, Datuk Patinggi Abang Johari Tun Openg diperambu deka bejadi pengawa Nasih Tanah Projek Jematan Batang Paloh, kena 22 Ogos ti ba taba projek besemak enggau Pengkalan Feri Batang Paloh, Mukah.
Menteri Muda Pekara Korporat enggau Unit Komunikasyen Perintah Sarawak, Abdullah Saidol madahka pengawa ngaga jematan ti deka nyadi jalai penyambung ngagai Pulau Bruit nya begunaka ungkus urung RM299 juta.
Enggau pemanjai 1.7 kilometer sereta ngaga jalai baru ke sepenyauh empat kilometer nuju ke jematan ari kededua piak, projek nya udah berengkah digaga kena 8 Mei 2019 lalu dipelaba tembu digaga kena 7 Mei 2023.
Projek ke digaga Hock Seng Lee Bhd nya deka nyilih servis Feri Batang Paloh.
Enti udah tembu digaga ila, nya deka meri empas besai ari sukut pemansang sosioekonomi kelebih agi ngagai komuniti orang berikan enggau bumai bekebun. Nya mega deka meri pengelantang laban timpuh pejalai deka nyadi pandak agi.
Aku mantaika peminta ngaga Jematan Batang Paloh enggau Jematan Batang Lassa ba taun 2015, lalu Kepala Menteri Datuk Patinggi Abang Johari madahka diri ngemendarka nya nengah Bajet Nengeri 2018.
Nya deka nyadi penambah ngagai jalai menua tebing pantai nyengkaum Jematan Batang Igan ke deka berengkah digaga enda lama agi, ku iya lebuh dipinta ngenang pasal pengawa ngaga jematan nya, kemari.
Kena Hari Satu, iya udah ngulu Aum Komiti Ngaga Penyendia Nasih Tanah Jematan Batang Paloh enggau Batang Igan di Daro ti bechairmanka Menteri Muda Infrastruktur enggau Pemansang Penyangkai Kapal, Datuk Julaihi Narawi.
Sama bisi datai, Sapit Sekretari Perintah Nengeri Dato Sri Abu Bakar Marzuki enggau Kaban Kunsil Nengeri Daro, Safiee Ahmad.
Ku iya, ngambi nitihka garis lalau Opis Menteri Pengerai Maya pentin Atur Nagang Pemindah Mulaika Pemanah (PKPP), semina 250 iku aja dikemendarka ngulu pengerami nasih tanah nya.
Kelimpah ari bala ketuai ejensi ke bekaul, sebagi besai bala ti dikangau Opis Pelilih Menua datai iya nya bala ketuai raban bansa ari genturung pendiau enggau enggau rumah panjai ke besemak enggau taba projek jematan nya, ku iya.
Berebak enggau nya, Abdullah ke mega ADUN Semop bisi nyuaka pemeri RM29,000 ngagai semilan gerempung ngambika bisi dikena melanja aktiviti ti dipejalaika sida.
Maksak Residen Mukah, Majlis Tilawah al-Quran Bagi menua Mukah, Kaunsil Pengelikun Jalai Alun Bagi Menua Mukah, Kelab Rando Opis Residen Mukah, Kelab Betanam Betupi Bagi M enua Mukah, Kelab Pengelantang Pendiau Islam JKR Bagi Menua Mukah, Kelab Sosial, Lumba enggau Main Opis Tanah enggau Survei Mukah sereta Kelab Rando Pejabat Pelilih Daro, ke sama bela nerima RM3,000, lalu komiti KMKK Bagi Mukah nerima RM5,000.