PDP udah ngatur program nemuai seraya belajar ke Bintulu
SIBU: Parti Progresif Demokratik (PDP) udah ngatur program nemuai seraya belajar ke Bintulu pengelama dua hari tiga malam, ti dipasuk urung 300 iku pesereta, iya nya raban Tuai Rumah ari sitak Kunsil Nengeri (DUN) Bawang Assan, Dudong enggau Meluan.
Ketuai Nembiak PDP Bagi Menua Bawang Assan, Kunsilor Joshua Ting madah, pengawa nya dibagika dalam tim ngambi nitihka atur prosedur operasyen standard (SOP).
Ku iya nambah, dalam pengawa nya semua pesereta berasai tekenyit sereta rindu meda gaya pemansang infrastruktur rumah panjai ti moden di Bintulu.
“Pemansang ngaga infrastruktur rumah panjai tu iya nya asil ari pengawa Presiden PDP Dato Sri Tiong King Sing pengelama betaun, kena nentuka pengawa ngaga rumah nya dijaga sereta dikemansangka,” ku iya.
Dalam timpuh ke sama, Ting meri terima kasih ngagai kerejasama semua raban ti udah ngasika semua SOP ngambika program tu bejalai enggau lanchar.
“Aku pechaya pengudah raban pesereta tu meda gaya pemansang infrastruktur rumah panjai ti moden nya, sida deka bulih penemu sereta pemereti ati senentang bida pemansang infrastruktur rumah panjai entara Sibu enggau Bintulu, ke bendar iya endang bekaul enggau peminta sereta dedikasyen ketuai peranak menua.
“Semua (peranak) rumah panjai bisi hak bulih pemaik enggau pemansang nya ngambika ulih nyungkak tikas pengidup sida, enda ngira rumah panjai ba menua pesisir tauka palan ke jauh agi nya,” ku iya nambah.
Berebak enggau nya, Ting madahka diri bulih mayuh pemaik nengah program tu lalu enti diberi peluang ke bukai dudi ila, iya deka nguji nentuka semua rumah panjai ba DUN Bawang Assan ulih dikemanah sereta dikemansangka enggau manah agi, ngambika nembiak redak rumah nya ulih ngasaika pengidup ti lantang agi enggau infrastruktur ke chukup.