Peranak menua pesisir mengkang begunaka bantu ari perintah: Rundi
KAPIT: Menteri Utiliti (Bekal Ai enggau Elekterik Menua Pesisir) Datuk Sri Stephen Rundi Utom, nyemetak madah komuniti Dayak di menua pesisir begunaka bantu ari perintah laban sida agi jauh tinggal ari sukut pelajar enggau ekonomi.
Komuniti Dayak ba menua pesisir begunaka bantu ari perintah laban sida jauh tinggal ari pemansang. Ba pekara pelajar enggau ekonomi endang kunchi besai ke patut diangkatka. Kami enda ulih nyadi sebagi ari orang ke seruran dikearapka kita belama lebuh kitai tuai megai. Kitai mesti nyaga diri kitai empu. Kitai mesti ngembuan pendiau tinggi. Dua faktor besai kebuah komuniti Dayak ba menua pesisir jauh tinggal ari pemansang iya nya dalam pelajar enggau penyeranta, ku Rundi bejaku lebuh ba pengawa ‘Ketuai Begulai Enggau Rayat’ di Rumah Budit Along, Nana Mekey lli, Merit, Batang Rajang ditu kena lemai Hari Satu, 17 Ogos kilah ensana.
Dikena ngangkatka tikas ekonomi enggau sosial, kitai patut pulai baru ngagai prinsip pemun, nembiak mesti dianjung ke sekula ngambi bisi pelajar ti bekualiti. Enti nadai pelajar, sida nya enda ulih nyadi ketuai opis tauka profesional .Enda ngira sekalika berapa mayuh duit dikemisi, nya tau abis. Penemu enggau pengelandik iya nya semanjai idup. Penemu enggau pengelandik tu mih kunchi ngagai pemujur enggau ngangkatka tikas status sosial kitai, ku iya nyemetak.
Kitai enda ulih bepanggai ngagai orang bukai. Kitai mesti ngangkatka diri kitai empu. Kitai mesti ngembuan juluk enggau peninggi pendiau diri. Dalam Kabinet Sarawak, Sapit Kepala Menteri Datuk Amar Douglas Uggah Embas ke mega Menteri Betanam Betupi
Moden,Tanah Adat enggau Pemansang Kandang Menua, Sapit Kepala Menteri Tan Sri Datuk Amar Dr James Jemut Masing, Pemansang Palan Penyangkai Kapal enggau Infrastruktur, enggau aku empu (Rundi) Menteri Utiliti. Tiga opis menteri besai ti betuaika bansa Dayak. Perintah meri kami peluang, pengawa betanam betupi, infrastuktur enggau utiliti endang tanggungpengawa ti pemadu beguna. Tu peluang kitai (Dayak) ngulihka pemujur. Kita mesti ngena pemaik peluang nya enggau manah kena ngangkatka diri. Nyema kita nadai pemujur maya bisi peluang, anang nanya kami jemah ila. Tu mih peluang ti diberi ngagai kita kena ngangkatka diri, ku Rundi.
Mantah peragam mensia mayuh ti madahka Dayak enda beserakup, ku iya nya enda betul ti ngumbai raban bansa Dayak enda beserakup. Enggau diri sebilik pan kitai ngembuan runding ti bebida sempama baka jari enda sama pemanjai.Kitai mesti sedia deka nerima tauka enda setuju.Raban Dayak endang beserakup. Ambika chunto,peranak rumah panjai diau ari baruh siti perabung.
Ba penemuai iya sebedau tu, Rundi udah meresa projek Kuasa Solar ti benung digaga ke meri bungkur bekal elekterik ngagai tiga buah rumah panjai iya nya Rumah Lasang Asun (6 pintu), Rumah Asan Kek (20 pintu) enggau Rumah
Budit Along (24 pintu) ti bisi 50 ruang bilik.
Iya mega bisi ngungkupka RM10,000 Projek Mit Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) Rumah Budit, sepenyampau RM5,000 ungkup Biro Indu Rumah Budit enggau RM5,000 ngagai JKKK Rumah Asan.
Sama bisi datai ba pengawa nya Menteri Muda Utiliti Skim Elekterik Menua Pesisir Alternatif Sarawak (SARES) Datuk Liwan Lagang, ADUN Pelagus Wilson Nyabong Ijang, Sekretari Politik Kepala Menteri Nicholas Kudi Jantai, Residen Kapit Nyurak Keti, Pemesai Opis Pelilih Menua Kapit Cerisologo Sabut, Mandal Presiden SEB Dr Chen Shiun, ASP Anthony Apui, Temenggong Wilfred Billy Panyau, Penghulu Wong Kie Ing, enggau Penghulu Madang Jelani.