93 projek nyeruri begunan repuk ba sekula di Sarawak dikemendarka
Dipelanja ngena belanja RM1 bilion, kunterik bayar pulai duit injau nitihka chara khas ti disetuju entara KPM, perintah Sarawak
KUALA LUMPUR: Perintah udah ngemendarka 93 iti projek nyeruri begunan repuk ba sekula di nengeri Sarawak ungkup fasa satu enggau fasa dua naka 17 Ogos, ngena ungkus RM700 juta, pia ku Sapit Menteri Pelajar I, Datuk Dr Mah Hang Soon.
Ku iya, pengawa ngaga projek nyeruri nya dipelanja ngena ungkup belanja RM1 bilion, iya nya kunterik bayar pulai duit injau nitihka chara khas ti udah disetuju entara Opis Menteri Pelajar (KPM) enggau perintah nengeri Sarawak.
Ku iya, naka bulan Julai tu tadi lalu bisi RM700 juta duit injau udah dibayar pulai perintah nengeri Sarawak.
“Ba semua nya, projek nyeruri begunan repuk ba sekula ngena duit turu RM1 bilion tu dipejalaika nengah tiga fasa; fasa satu mungkur 41 buah sekula ngena ungkus projek sepenyampau RM350 juta lalu fasa dua mungkur 52 buah sekula ngena ungkus projek RM350 juta.
“Fasa tiga benung ditukuka
Sapit Menteri Pelajar I
KPM enggau perintah nengeri Sarawak rintai enggau skop projek ke alai ungkus projek nya bisi RM300 juta,” ku iya ba sesi tanya saut aum Dewan Rakyat, kemari.
Iya nyaut tanya Datuk Robert Lawson Chuat (GPSBetong) ke deka nemu status projek mulaika pemanah, ngangkatmanah tauka ngemaru sekula repuk di Sarawak pengudah nengeri nya mayar RM700 juta ke nyadi bayar duit injau kunterik RM1 bilion ngagai perintah besai.
Dr Mah, ti madahka silik status ngaga projek fasa satu, madahka bisi 21 projek benung ba renggat digaga lalu 20 projek iti agi ba renggat baru deka digaga.
Ku iya, projek renggat baru deka digaga nya mungkur empat projek benung dalam proses beratika rega tinda, lima projek dalam proses ngeluar Surat Setuju Nerima, lima projek dalam proses ngenukuka pengawa nyiri kunteriktor lalu enam iti projek dijangka ditinda ujung bulan September tu.
Ungkup status ngaga projek Fasa dua,iya madahka semua projek ke ba renggat baru deka digaga, Opis Kereja Raya Sarawak benung bejalaika pengawa nyukat sereta nyendiaka dokumen tinda lalu projek nya dipelaba ditinda nengah chara berengat berengkah ari 22 Ogos.
Ku iya, pengawa ngaga projek nyeruri begunan repuk nya mungkur mayuh macham skop baka ngaga bilik kelas, blok opis sekula, buding, rumah pengajar, kuarters, dewan makai,librari, bilik sains, enggau enggau fasiliti ke bukai.
Nyaut tanya tambah Lawson sentang penyampau sekula dalam sitak Parlimen Betong ti udah dikemendarka ngambika diseruri ari baruh ungkup belanja nya, Dr Mah madahka bisi semilan buah sekula udah dikemendarka baka Sekula Primari (SK) Mangut; SK Spaoh; SK Bungin; SK Medang; SK Suri; enggau Sekolah Sekondari Spaoh. — Bernama
Ba semua nya, projek nyeruri begunan repuk ba sekula ngena duit turu RM1 bilion tu dipejalaika nengah tiga fasa; fasa satu mungkur 41 buah sekula ngena ungkus projek sepenyampau RM350 juta lalu fasa dua mungkur 52 buah sekula ngena ungkus projek RM350 juta.
Datuk Dr Mah Hang Soon