Ungkus kuarantin, peresa COVID-19 semua rayat Sarawak ke pulai ari menua luar ditanggung perintah nengeri

KUCHING: Perintah Sarawak nanggung ungkus belanja kuarantin enggau peresa COVID-19 ungkup semua rayat Sarawak ke pulai ari menua luar.

Sapit Kepala Menteri, Datuk Amar Douglas Uggah Embas madah, semua rayat Sarawak ke pulai ari menua luar enda tau enda dikuarantin pengelama 14 hari sereta atur nya enda tau enda dititihka.

“Dalam timpuh (14 hari kuarantin ke enda tau enda), sida deka diperesa dua kali meresa COVID-19 iya nya hari ke-2 enggau hari ke10.

“Perintah besai udah ngaga pemutus ke alai semua ungkus meresa COVID-19 rayat Malaysia ke pulai ari luar menua ditanggung sida iya empu, tang sehari tu (kemari) aku udah berandau enggau YAB Kepala Menteri (Datuk Patinggi Abang Johari Tun Openg) iya ngaga pemutus ungkup anak Sarawak ke pulai ari menua luar ti dikuarantin ba Kuching sereta maya beperesa COVID-19, Perintah Nengeri sarawak deka nanggung ungkus nya.

“Lalu ngasai sida ke ukai rayat Sarawak (Semenanjung, Sabah, Labuan enggau ukai peranak menua) ke pulai ari menua luar tama ke Sarawak, ungkus kuarantin enggau ungkus peresa COVID-19 sida iya mayar kediri,” ku iya sereta madah atur nya diteritka nyentuk 31 Ogos 2020.

Uggah ti mega Chairman Komiti Mutarka Penusah Ngenyit Nengeri Sarawak mansutka pekara nya ba aum pengarang berita COVID19 Sarawak ti diatur ba Begunan DUN Lama ditu, kemari.

Entara pekara bukai ti diputuska komiti nya nyengkaum Opis Menteri Kaunsil Kandang Menua enggau Pengawa Berumah Sarawak udah mantaika garis Lalau (SOP) ungkup Palan Pemerindang Belisin ti ke deka beoperasyen enggau patut nitihka SOP Karaoke ti disediaka.

Atur tu diteritka berengkah 20 Ogos 2020, ku Uggah.

“Lalu aktiviti indoor busking mega patut bepelasarka SOP ‘Live Event’ ke udah disediaka Menteri Dagang Temuai, Seni enggau Main Asal Sarawak. Atur tu berengkah diteritka kena 20 Ogos 2020,” ku iya.

Kelimpah Uggah madahka bisi meresa 114 pengajar enggau staf Taska ke alai semua negatif COVID-19.

Sama bisi ba aum pengarang berita nya kemari Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah enggau Direktor Opis Pengerai Nengeri Sarawak Dr Chin Hin Zing.