Karim: Individu, komuniti dalam industri ‘homestay’ deka dibantu nengah bemacham insentif
KUCHING: Opis Menteri Dagang Temuai, Seni enggau Main Asal sedia mantu sereta ngembing individu tauka komuniti ti deka bejalaika dagang dalam industri homestay ba kandang menua pesisir nengeri tu.
Menteri nya, Datuk Abdul Karim Rahman Hamzah madahka mayuh macham insentif sereta bantu disediaka opis menteri ke tuju nya.
Iya madah, insentif sereta bantu ungkup pengemeran homestay mega disediaka Opis Menteri Dagang Temuai, Seni enggau Budaya Malaysia (MOTAC).
Ku iya, kemaya hari tu ulih dipeda insur ba industri homestay di nengeri tu kelebih agi ba kandang menua ulu enggau menua pesisir baka di Telok Melano tang bisi sekeda penanggul ti ditapi pengemeran industri nya baka ari sukut puku.
Kami meransang sida datai ngagai opis menteri aku tauka MOTAC ba renggat nengeri ngambika meda sereta nemu insentif nyengkaum bantu ke ulih dikunsi begulai dikena ngemansangka agi dagang sida, ku iya ngagai Utusan Borneo kemari.
Abdul Karim madah, pengemeran homestay dipeda ngembuan potensial ti ulih dikerembaika agi ba kandang menua pesisir laban nadai mayuh kompeni hotel ke besai ti nyanggup beranakka puku ngaga hotel ba endur nya.
Ya, kami endang meransang individu tauka komuniti kandang menua tu muka homestay di menua pesisir kena nyendiaka perengkaguna palan endur diau ngagai temuai ti rinduka aktiviti ngelantangka ati ba kampung tauka deka meda pemanah rampa menua.
Sida tau ngena rumah panjai ke bisi tauka rumah selama nyadika homestay tang patut nentuka sukut pengelikun enggau pemeresi dikemerat, ku iya.
Iya nambah, nengah chara nya peranak menua pesisir ulih nyungkak penatai pemisi sida sereta ulih ngemayuhka agi servis dagang temuai di nengeri tu.