Perintah Sarawak bisi kuasa neritka SOP PKP
KUCHING: Perintah Sarawak bisi kuasa bejalaika atur enggau prosedur operasyen standard (SOP) Atur Nagang Pemindah (PKP) kena munaska COVID-19, ti setipak enggau gaya nengeri tu empu.
Sapit Kepala Menteri Datuk Amar Douglas Uggah Embas madahka, Sarawak bisi Akta kediri empu (Akta Nyeliah enggau Nagang Penyakit Berampit (Atur Nagang Dalam Kandang Ke Dirampit) Atur 2020) ti meri kuasa ngagai nengeri tu bejalaika atur ti setipak enggau gaya nengeri.
“Sebedau tu iya (Menteri Kanan (Kluster Pengelikun) Datuk Seri Ismail Sabri
Yaakob) mantai penetap ti sama tang enda nyengkaum nengeri Sarawak laban kitai bisi atur ke ulih dikena, lalu tu disetuju perintah besai ti ngemendarka (SOP) setipak enggau gaya Sarawak.
“Nya kebuah ari siti timpuh ngagai siti timpuh SOP kitai taja pan bepelasarka nama ti diputuska Kuala Lumpur tang kitai ngenipakka enggau gaya ba Sarawak.
“Nengah Akta tu Sarawak bisi kuasa tauka ulih ngena (SOP) diri empu asal aja enda ngelaban enggau sida din (SOP perintah besai),” ku iya lebuh ditanya bekaul enggau Perintah Besai ti ngelalau perintah nengeri ngambika betanya ngagai Aum Khas Bala Menteri Sentang Atur
Neritka PKP dulu sebedau ngaga sebarang pemutus bekaul enggau SOP PKP.
Iya ti mega Chairman Komiti Mutar Penusah Ngenyit Nengeri Sarawak madah pekara nya ba aum pengarang berita COVID-19 Sarawak ti diatur ba Begunan DUN Lama ditu, kemari.
Kelimpah ari nya, Uggah madahka barang sapa ari Semenanjung, Sabah enggau Labuan ke tama ke Sarawak patut nitihka SOP ke udah ditetapka, nyengkaum orang dagang sereta temuai.
“Barang bagi sapa ti deka datai ke Sarawak (ari Semenanjung, Sabah enggau Labuan) lebih ari dua hari, sida patut dikuarantin sereta tau pansut enti udah tembu beperesa COVID-19.
“Kitai bedau meransang temuai datai nemuai ke Sarawak diatu lalu kitai pechaya sida mega apin deka datai ke Sarawak.
“Tang ba Sarawak empu opis menteri kitai (Opis Menteri Dagang Temuai, Seni enggau Main Asal Sarawak) udah ngatur program laban nadai agi ditagang pemindah dalam Sarawak,” ku iya.
Sama bisi ba aum pengarang berita nya kemari Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah enggau Direktor Opis Pengerai Nengeri Sarawak Dr Chin Hin Zing.