Pengawa numbuhka UNIFOR kelai perintah ibuhka jalai pengarap bukai
LAWAS: Pengawa numbuhka Unit Pekara Jalai Pengarap Bukai (UNIFOR) ba Opis Kepala Menteri, siti pengawa ti dikereja perintah belama kena mutarka pekara ti bekaul enggau pekara ti dikemerat engau diguna jalai pengarap bukai di Sarawak.
Sekretari Peribit Sapit Menteri ba Opis Menteri Pemansang Menua Pesisir (KPLB) Malaysia, Steve Lius madahka UNIFOR mega bukti nyaga pekara ti dikemerat semua rayat ari semua jalai pengarap.
“UNIFOR deka nyadi pelasar alai minta duit turu enggau tanah endur numbuhka gerija baru tauka ngangkatmanah nyengkaum bemacham pekara ti bekaul enggau ngatur rumah jalai pengarap nya,” ku iya lebuh bejadi Sesi Meri Penerang Minta Bantu Ari Duit Turu Rumah Jalai Pengarap Bukai (UNIFOR) ba Hotel Seri Malaysia Lawas, bedau lama udah.
Ku iya, pengawa numbuhka UNIFOR nyadi sebuah agensi perintah nengeri datai ari runding ex- Kepala Menteri Sarawak,niang Pehin Sri Adenan Satem ti megai tanggungpengawa nyaga polisi kena ngelakuka pengelikun entara jalai pengarap.
Berebak enggau nya ku iya, UNIFOR ngembuan tanggungpengawa berati, merambu enggau nyimpul polisi , undang-undang enggau atur ti bekaul enggau pekara jalai pengarap ukai Islam di Sarawak.
“Perintah Sarawak deka terus nentuka nadai tatak ngemeranka jalai pengarap ngambika majak manah dikemeran ungkup ke pemaik rayat pupu bansa enggau usul,” ku iya.
Sekretari Pampang Nembiak Parti PBB Pampang Ba’kelalan nya mega minta raban biak regas agi ngaul diri ba aktiviti gerija enggau rumah jalai pengarap sida empu, kena nentuka sida ulih ngeraga diri ari pengawa ti enda manah ke tau ngerusak pengidup sida jemah ila.