RM30 juta diungkup kena ngangkatmanah Palan Jelu Siga Semenggoh
Fasiliti, aksesbiliti internet deka diangkatmanah ngambika meri pengelantang ngagai temuai ke kia
“
Ba (Palan Jelu Siga) Semenggoh tu baka ti udah dipadah kitai deka meri ungkup belanja sepenyampau RM30 juta dikena ngangkatmanah fasiliti enggau
” mega aksesibiliti internet ba endur tu.
Datuk Patinggi Abang Johari Tun Openg
Kepala Menteri
KUCHING: Perintah nengeri ngungkupka belanja urung RM30 juta ngagai Palan Jelu Siga Semenggoh dikena ngangkatmanah fasiliti enggau aksesibiliti internet ngagai endur tu.
Kepala Menteri,Datuk Patinggi Abang Johari Tun Openg madahka atur pengawa ngangkatmanah fasiliti enggau aksesbiliti internet nya dibagi ngagai tiga pekara ngambika ulih meri pengelantang sereta nyadi pematak ngagai temuai ari serata dunya ti datai ngagai palan tu.
“Ba (Palan Jelu Siga) Semenggoh tu baka ti udah dipadah kitai deka meri ungkup belanja sepenyampau RM30 juta dikena ngangkatmanah fasiliti enggau mega aksesibiliti internet ba endur tu.
“Tu dibagi ngagai tiga, keterubah ba pintu penama, kedua, Taman Botani enggau ketiga iya nya alai kitai meda nama utai ke bisi ba Palan Jelu Siga tu. Ketetiga tu deka disambungka.
“Ari siti timpuh ngagai siti timpuh ke bukai kitai deka meri fasiliti, ambika chunto kena masuk ke dalam kandang endur tu ari pintu penama, kitai deka nyendiaka ‘baggie’ ti deka diaduka sida Sarawak Forestry Corporation (SFC) enggau jalai tama
ke dalam digaga ngena kayu laban tu rampa menua asal ke patut dijaga,” ku iya.
Abang Johari mansutka pekara nya ba aum pengarang berita ti diatur ba Palan Jelu Siga Semenggoh ditu, kemari.
Dulu ari nya, iya bejadi pengerami ‘Perletakan Batu Asas Semenggoh Rainforest Discovery Centre Enggau Bejadi Bungkur Internet’ ti mega nyadi sebagi ari pengawa ngangkatmanah ba Palan Jelu Siga Semenggoh.
“Pemadu beguna mega iya nya pansik, kitai deka nyendiaka spesis ungkup orang ti bejalaika pansik bekaul enggau biodiversiti kitai lalu nengah chara tu kitai ulih nyemelaka pemendar kitai bejalaika kereja mulaika pemanah sereta ngintu enggau endur pendiau ditu,” ku iya.
Pengeran deka bejalaika kereja mulaika pemanah sereta ngintu tu ku iya, deka nyadika Sarawak palan hab kereja ngibun lalu Perintah Sarawak ngungkupka mayuh belanja ba pengawa nuju Sarawak nyadi rampa menua gadung.
Kelimpah ari di Semenggoh, perintah nengeri mega deka ngangkatmanah Gua Niah, Taman Negara Bako, Lambir sereta Gunung Buda.
“Kitai ngembuan mayuh pesaka bekaul enggau biodiversiti enggau jelu siga sereta fasiliti enggau aksesibiliti internet tu dikemansangka dalam timpuh lima taun, ti dipejalaika ngena chara enda ngeruga rampa menua asal,” ku iya.
Sama bisi datai ba pengerami nya kemari, Menteri Dagang Temuai, Seni enggau Main Asal Datuk Abdul Karim Rahman Hamzah enggau Menteri Muda Pemansang Mengeri enggau Pengeraja Asal Datu Len Talif Salleh sereta ke bukai.