COVID-19: Kes di Sarawak mengkang 682,nadai kes positif baru kemari

KUCHING: Komiti Mutarka Penusah Ngenyit Nengeri Sarawak (JPBN) ngeripotka Sarawak nadai kes positif baru COVID-19 ti ngujungka penyampau semua kes positif COVID19 ba nengeri tu agi 682 kes, naka kemari.

JPBN nengah penerang berita mega madahka nadai kes baru ti udah gerai sereta dikemendarka pansut ari sepital ti nyadika penyampau semua kes positif COVID-19 udah gerai sereta dikemendarka pansut ari sepital agi 660 iku tauka 96.77 peratus.

“Sehari tu mega nadai kluster COVID-19 udah abis.

“Penyampau kluster ke agi aktif agi tujuh kluster ti mungkur 62 iku kes iya nya Kluster Kompeni Injiniring (agi lapan kes); Kluster Mambong (agi tujuh kes); Kluster Pasar Stutong (agi tujuh kes); Kluster Sentosa( agi 31 kes); Kluster PUI Melbourne (agi tiga kes); Kluster Kompeni Ngaga Rumah Kuching (agi dua kes) enggau Kluster Pasar Satok (agi empat kes),” ku JPBN kemari.

Kemari mega bisi tiga iku agi diperubatka ba wad isolasyen sepital, sereta penyampau bebadi nyawa ketegal COVID-19 agi 19 iku tauka 2.79 peratus.

Bisi 38 PUI baru diripotka kemari kelimpah ari bisi tujuh (7) kes agi nganti peresamakmal.

Nambahka nya kemari bisi 146 Person Under Surveillance udah ngerejista tama sereta dikuarantin ba hotel, ti nyadika penyampau semua PUS ba 16 buah hotel bisi 730 iku. Bisi 21,824 PUS udah abis timpuh kuarantin.

Kelimpah ari nya, bepelasarka penerang berita ari JPBN, polis udah ngeluarka 15 notis kompaun laban nanjang Garis Lalau (SOP) ke udah ditetapka.

“Notis kompaun nya dikeluarka ba Kuching (5), Padawan (5),Kota Samarahan (3), di Sarikei enggau Betong sama siti kompaun,” ku JPBN.

Polis mega terus ngemata sereta neritka SOP Atur Nagang Pemindah Mulaika Pemanah (PKPP) nyengkaum pasal ngena sengkabung idung enggau mulut.

Bisi 1,537 premis diperesa kemari iya nya Supermarket (178), Restoran (338), Kilang (8), Bank ,(110), Opis Perintah (63), Pedaja (69), Pasar Tani/Mensia Mayuh (83), Palann Sembiang (72), Palan Rekreasyen (34), Palan Alai Ngaga Rumah (15)enggau ke bukai (567).

Bisi 646 iku raban meresa PKPP nyengkaum PDRM (312), ATM (38), RELA (135), APM (106), PBT (38), KKM (8) enggau ejensi ke bukai (9).

Bekaul enggau atur pengawa ngempang jalai alun nengah ‘Op Benteng’, bisi enam pengawa ngempang jalai alun ba lima pelilih menua iya nya di Lundu (2), Bau (1), Serian (1), Sri Aman (1) enggau Lubok Antu (1) lalu ari Op nya bisi 951 buah perengka pengangkut diperesa.