Ukum RM1,000 ngelanggar SOP kelalu berat, nating rayat
Perintah patut nyerenih baru atur tu laban nya kelalu berat sereta nating rayat tang tau meri ukum nengah chara berenggat
SIBU: Perintah dipinta nyerenih baru senentang atur ukum RM1,000 ungkup orang ti ditemu ngelanggar operasyen standard (SOP) lebuh timpuh Atur Nagang Pemindah Mulaika Pemanah tu, ku Sapit Tukang Wang Besai Parti Progresif Demokratik (PDP) Dato Sri Lau Keung Chai.
Taja ukum nya ulih dipinta kurang, tang ku iya pekara tu apin bisi penerang senentang naka ni penyampau ukum nya ulih dikurangka.
“Kompaun RM1,000 nya dipeda kelalu berat. Tuju PKPP iya nya kena nerenak pemereti ati rayat sereta nagang pengelekai penyakit tu (Covid-19), tang ukai nya ngenusahka rayat.
Sapit Tukang Wang Besai Parti Progresif Demokratik (PDP)
“Endang aruh iya deka nyadi tating penusah ke berat ngagai mensia mayuh kelebih agi sida ti ngembuan penatai pemisi ti mit,” ku iya dalam siti penerang, apin lama ke udah.
Nitih ku iya, bisi siti ruang bilik di nengeri Selangor empai lama ti ngembuan enam iku penyampau diri sebilik bejalai ngagai pasar besai, lalu diberi ukum mata duit RM6,000 ketegal enda nitihka SOP ti udah ditetapka.
Ku Lau nambah, suah kitai ninga berita bekaul enggau sekeda rayat ti diukum ketegal enda nyaga seraka fizikal lebuh makai ba luar/kedai.
Berebak enggau tu, iya minta ngambika raban diri sebilik ti makai ba luar tauka kedai tau enda ibuh nyaga seraka fizikal, lebuh makai begulai ba siti mija.
“Berindik ari chara tu, restoran mega ulih ngelimatka palan enggau ungkus belanja dagang sida.
“Polis tau meri ukum ngagai siku ari bala diri sebilik ti ngelanggar SOP nya, ngambika sida enda nandu penyalah tu baru lalu ukai semina mansutka saman aja, tang meri jaku lalau dulu sebedau meri ukum nya,” ku iya nyemetak.
Lau madahka ekonomi menua tu diatu benung kusut lalu mayuh orang lenyau batang pengawa enggau diputung upah.
“Semua orang ngelimat belanja dikena idup sereta mar alai ngiga rejeki.
“Enti sema perintah agi netapka ukum ti berat ngagai rayat ungkup timpuh ke diatu, nya ukai semina nambahka tating pengidup aja tang tau ngujungka rayat berasai enda puas ati ke perintah,” ku iya.
Ku Lau, mayuh rayat Sarawak sebana ngagai iya senentang penyampau ukum RM1,000 ti kelalu tinggi, lalu sida enda ulih mayar nya enti diukum ketegal ngelanggar SOP.
Nya alai, iya ngarapka perintah nyerenih baru senentang atur tu.
“Enti raban pemesai penerit adat meri jaku tangkan dulu sebedau mansutka saman, mensia mayuh dipelabaka aku ulih nyendiaka diri nerima atur nya,” ku Lau nambah.
Berebak enggau tu, iya minta perintah nurunka penyampau ukum mata duit ungkup orang ti ditemu ngereja penyalah nya ngagai RM250 (renggat keterubah), sereta nurunka rega sengkabung idung enggau mulut nyentuk ke mensia mayuh ulih meli nya.
“Ku iya, perintah tau ngena atur meri ukum nengah chara bererenggat.
“Ambika chunto, ungkup keterubah ditemu ngereja penyalah nya, deka diukum RM250. Enti sida agi nandu ngereja penyalah tu, sida deka diukum RM500 enggau RM1,000 tauka dijil enti nandu penyalah nya ungkup ketiga kali,” ku penemu iya.
Taja pia, Lau ngelalau bala rayat sekalika bisi ukum tauka enda, ungkup pengerai enggau pengelikun sida empu, semua orang mesti ngena sengkabung idung enggau mulut lebuh ngelawa palan tauka ngena perengka pengangkut mensia mayuh dalam timpuh PKPP tu.
Kompaun RM1,000 nya dipeda kelalu berat. Tuju PKPP iya nya kena nerenak pemereti ati rayat sereta nagang pengelekai penyakit tu (Covid-19), tang ukai nya ngenusahka rayat.
Dato Sri Lau Keung Chai