Kemeratka tikas pemeresi kandang endur kena nyeliahka sebarang bansa penyakit: Harden
SRI AMAN: Tikas pemeresi kandang rumah begenturung, rumah panjai enggau genturung pendiau patut dijaga ngambika enda nyadi alai nyamuk betelu, kelebih agi nyamuk aedes ti ulih mai penyakit denggi.
Menteri Muda Pengelantang Komuniti Sarawak, Datuk Francis Harden Hollis madah, endang udah tanggungpengawa Komiti Pemansang enggau Pengelikun Genturung Pendiau (JKKK) tetiap kandang rumah begenturung, rumah panjai enggau genturung pendiau nentuka kandang endur sida seruran beresi sereta nadai napi sebarang bansa penyakit.
“Nyema kandang endur kita kamah, tu tentu deka mai mayuh macham penyakit baka denggi,chirit,tabin’kep ialu’ enggau ke bukai kelimpah tau meri penusah ngagai orang ke diau ba genturung pendiau nya,” ku iya.
“Sebedau penyakit tu ngeruga pengidup kitai, aku ngansak raban JKKK tetiap kandang endur ba pelilih menua tu ngambika ngatur program pengawa beripai abis nadai sekali dalam sebulan.”
Iya ke mega Kaban Kunsil Nengeri Simanggang madah munyi nya lebuh bejaku pandak ba ‘Program Beripai’ ti diatur begulai enggau Parti Se’Ati Rayat Sarawak (SUPP) Pampang Simanggang enggau Kaunsil Pelilih Menua Sri Aman (MDSA) ba Pasar Sri Jaya, Sri Aman ditu pagi ensana.
Nitih ku iya, pengawa beripai ti diatur mesti nyengkaum kereja meresi ngelingi kandang endur nya baka nebas rumput, nentuka parit ai enda ditekul uras, ngumpul uras enggau ke bukai.
“Palan ke enda diberesi enggau manah bepotensial ulih nyadi sarang nyamuk aedes,” ku iya seraya nambah JKKK mesti ngambi inisiatif kediri empu ti enda bepanggai ngagai penatai raban MDSA dalam ngatur pengawa beripai.
“Kelimpah enggau nya, Francis nyemetak madah aktiviti beripai enda patut dianggap bemusim, tang mesti dipejalai ba ninting maya, ukai nyauka semak maya pengerami aja.
“Nyema kandang endur kita beresi, tu udah tentu mandangka ulah orang ke diau ba palan nya ngembuan tanggunggungpengawa enggau nemu gaya ngelingi kandang endur sida,’ ku iya.
Ku iya baru, iya pechaya, mayuh komuniti diatu ngembuan pemereti ati bekaul enggau penyakit ti ulih nabanka nyawa nya baka penyakit denggi nengah kimpin pemeresi ti diatur raban opis kaunsil, opis pengerai enggau ejensi perintah sereta peribit,’ ku iya nambah.
“Berita bekaul enggau kimpin pemeresi nengah media rama mega nyungkak pemereti ati mensia mayuh sentang pemesai guna nyaga pemeresi ba palan endur kitai diau,’ ku iya enggau nyemetak.
Sama bisi datai ba pengawa nya, kaban Parti SUPP Pampang Simanggang, Kaban Kaunsil Pelilih Menua Sri Aman (MDSA) enggau staf MDSA ke bukai.