Penanggul penyekut jalai di Jalai Lopeng Tengah deka teputar nengah projek ngemesaika jalai
MIRI: Penanggul penyekut jalai ba Jalai Lopeng Tengah dipelaba ulih diputar dalam timpuh tiga bulan nengah projek ngemesaika jalai sereta ngelekatka api trafik ti begunaka ungkus RM1 juta.
Menteri Perengka Pengangkut Sarawak Datuk Lee Kim Shin madah, peminta ti digaga peranak genturung pendiau nya kenyau dua taun ke udah diatu nerima timbal ari perintah nengeri.
Perintah nengeri ngungkupka RM1 juta ngagai Opis Kereja Raya (JKR) Sarawak ngambi ngangkatmanah jalai alun tauka simpang tiga Kampung Lopeng ti mungkur pengawa ngemesaika jalai sereta ngelekatka api trafik, ku iya maya bejalai ngabas seraya kereja ngagai palan projek nya ditu kemari.
Ku iya nambah, projek ngemesaika agi jalai alun nya udah berengkah kemari enggau begunaka timpuh pengelama dua bulan ngaga nya.
Nya alai pengudah penemu nya ila, baru didirika tiang lampu trafik.
Projek tu disadang tembu dalam timpuh tiga bulan ti udah berengkah kemari enggau ngemesaika jalai lalu pengudah nya tembu ila baru ngengkahka api trafik ba simpang tiga.
Projek ngemesaika jalai tu nadai deka ngachau jalai nya lalu penguna ulih nengah Jalai Lopeng Tengah tu baka selama, ku iya.
Lee ke mega Kaban
Kunsil Nengeri Senadin madah, simpang tiga nya endang palan penusah bebadi jalai alun ke suah nyadi lalu patut dikemanahka ke pengelikun penguna ti nengah nya.
Kelimpah jalai alternatif ngagai Sepital Miri, Jalai Lopeng Tengah mega nyambung ngagai Kampung Lopeng Tengah, Kampung
Lembah Hijau, sekula, pendam tauka ngagai mengeri besai.
Ketuai Bansa Kampung Lopeng Tengah Nilawati Simat meri terima kasih ngagai perintah nengeri ti udah ningaka sebana peranak bekaul enggau pekara ngangkatmanah jalai alun nya.
“Aku ngarika peranak
Kampung Lopeng Tengah meri terima kasih sereta gaga ati laban perintah nengeri udah setuju deka bejalaika projek ngemanahka jalai nya, ku iya.
Sama bisi datai iya nya Injinir Bagi Menua JKR Miri Chong Chi Fam sereta kunsilor ari Kaunsil Mengeri Miri (MBM) enggau peranak Kampung Lopeng Tengah.