120 kes penusah angus rumah panjai dalam lima taun
Penyampau nya mungkur tujuh zon iya nya Kuching, Samarahan, Sri Aman, Sibu, Bintulu, Miri, Limbang: JPBM
KUCHING: Opis Bomba enggau Penyelamat Malaysia (JPBM) Sarawak ngerikod 120 kes penusah angus rumah panjai ari taun 2015 ngagai 31 Julai 2020.
Direktor JPBM Nengeri Sarawak, Khirudin Drahman madahka penyampau nya mungkur tujuh zon di nengeri tu iya nya zon Kuching, Samarahan, Sri Aman, Sibu, Bintulu, Miri enggau Limbang.
Iya madahka dalam timpuh 2015 ngagai 31 Julai 2020, statistik penusah angus rumah panjai nitihka zon iya nya, Zon Kuching nadai ngerikod sebarang kes, Samarahan (5), Sri Aman (26), Sibu (38), Bintulu (23), Miri (22) enggau Limbang (6).
“Bisi sekeda orang ngaga artikel tauka penerang kurang betul bekaul enggau penusah angus rumah panjai ba nengeri tu, sida enda betanya ngagai kami dulu ti ngujungka meri pengirau ati ngagai raban bansa.
“Kes penusah angus rumah panjai ti dirikod ba Zon Sibu iya nya ba taun 2015 bisi lima kes, 2016 (8), 2017 (9), 2018 (6), 2019 (8) enggau ba taun 2020 naka 31 Julai bisi dua kes, ti nyadika semua penyampau kes rumah panjai angus dalam Zon Sibu ari taun 2015 nyentuk 31 Julai 2020 bisi 38 kes, lalu enti disengkaumka enggau siti kes ke nyadi di Julau apin lama udah, nyadika semua nya 39 kes.
“Tang penerang ke dipadahka sida nya bisi 38 kes penusah angus nyadi ba Zon Sibu dalam taun tu. Penerang tu enda betul,” ku iya lebuh nerang sereta ngemetulka pekara nya.
Iya mansutka pekara nya ba aum pengarang berita bekaul enggau penusah angus rumah panjai di nengeri tu, ti diatur ba Indu Opis JBPM Sarawak ditu, kemari.
“Enti ditambah enggau dua (kes) penusah angus rumah panjai ke nyadi dalam bulan Ogos, naka ke sehari tu bisi 122 kes (dalam timpuh 2015 ngagai 21 Ogos 2020),” ku iya seraya madah dua kes nya bedau dipasuk dalam statistik lalu pansik kebuah angus bedau dipejalaika.
Bepelasarka kes ti nyadi nitihka endur Balai Bomba, iya madahka zon tengah iya nya Zon Sibu ngerikod kes pemadu tinggi laban nitihka penyampau rumah panjai enggau rumah panjai ti ngachir, kelimpah ari akses jalai nengah sungai, kedua iya nya Zon Sri Aman ti napi pekara ke sama kelimpah ari Zon Bintulu enggau Miri.
Nambahka nya, iya madahka bisi tujuh kebuah tauka penyadi kes penusah angus rumah panjai dalam timpuh entara taun 2015 ngagai 31 Julai 2020.
“Nitihka pansik (dalam timpuh 2015 nyentuk 31 Julai 2020), penusah angus rumah panjai nyadi ketegal elekterik bisi 54 kes tauka 45 peratus, kereban gis 29 kes (24 peratus), api bebara 18 kes (15 peratus), machis/ pemantik api 8 kes (7 peratus), kelita 5 kes (4 peratus), dian 3 kes (2 peratus) enggau ke bukai bisi tiga kes (3 peratus).
“Maya penusah angus rumah panjai tu nyadi pemadu tinggi entara pukul 6 pagi ngagai 12 tengah hari, iya nya 37 peratus. Jam tu orang ke diau di rumah iya nya orang tuai enggau bala anak mit, sida ke bukai nurun gawa,” ku iya.
Anggar pengerugi ti ditanggung dalam timpuh ke sama tu iya nya RM95,696,622.00 tauka (58) peratus lalu anggar reta tengkira ti ulih diselamat bisi RM67,887,395.00 (42 peratus).
Bekaul enggau penyampau pintu rumah panjai ke ulih diselamat ba penusah angus dalam timpuh 2015 ngagai 31 Julai 2020, iya nya bisi 1,5543 pintu tauka 59.1 peratus enggau 1,074 pintu diselamatka tauka 40.9 peratus.
Sama bisi ba aum pengarang berita nya kemari Penulung Direktor Operasyen JBPM Sarawak, Tiong Ling Hii enggau bala ke bukai.
Bisi sekeda orang ngaga artikel tauka penerang kurang betul bekaul enggau penusah angus rumah panjai di nengeri tu, sida enda betanya ngagai kami dulu ti ngujungka meri pengirau ati ngagai raban bansa.
Khirudin Drahman
Direktor JPBM Nengeri Sarawak