Siku peranak menua tu, dua iku peranak Indonesia ditangkap ari baruh tiga akta
KUCHING: Pasukan Gerakan Am (PGA)Sarawak udah ngabas ngenyit sereta nangkap siku peranak menua tu enggau dua iku lelaki peranak menua Indonesia, ari baruh tiga akta.
Sekretariat Komiti Mutarka Penusah Ngenyit Nengeri Sarawak (JPBN) nengah penerang berita madah, sida tiga nya ditangkap begulai enggau barang ke dirampas.
“PGA udah ngabas ngenyit sereta nangkap siku peranak menua tu enggau dua iku lelaki peranak menua Indonesia begulai enggau barang rampas, iya nya sebuah entukar Myvi enggau senyata baka duku (1), pisau (2) ti diselitka ba sepiak endur dudu deriba di Kampung Mujat, Serian.
“Sida tiga ditangkap ari baruh seksyen 26A ‘Akta anti Pemerdagangan Orang dan Penyeludupan Migran (ANTIPSOM) 2007’ enggau’ Seksyen Akta BahanBahan Kakisan, Letupan dan Senjata Berbahaya (ABKLSB) 1958’ sereta ari baruh Akta Imigresyen 1959.
“Sida udah ditangkap lalu barang dirampas sereta diserah ngagai Balai Polis Tebedu enggau IPD Serian ngambika aksyen ke patut dipejalaika,” ku JPBN Sarawak, kemari.
Abas ngenyit enggau pengawa nangkap nya dipejalaika nyerumba pengawa ngempang jalai alun ‘Op Benteng’ enggau nangkap.
Kemari bisi enam pengawa ngempang jalai alun ba lima (5) buah pelilih menua nyerumba Op benteng iya nya di Lundu (2),Bau(1), Serian(1), Sri Aman(1) enggau Lubok Antu (1).
Ari enam pengawa ngempang jalai alun nya, bisi 1,546 buah perengka pengangkut udah diperesa.
Kelimpah ari nya, bekaul enggau notis kompaun, PDRM udah ngeluarka tujuh notis kompaun laban enda nitihka Garis lalau (SOP) ti dikeluarka ba Padawan (3), Kota Samarahan (2), Sarikei (1) enggau Betong (1).
Nambahka nya, PDRM terus neritka SOP nyengkaum bekaul enggau pengawa ngena sengkabung idung enggau mulut ba palan mensia mayuh.
Bisi 1,702 premis udah diperesa kemari iya nya Supermarket (249), Restoran (331), Kilang (10), Bank (124), Opis Perintah (77), Pedaja (51), Pasar Tamu/ Mensia mayuh (85), Palan Sembiang (76), Palan Rekreasyen (35), Palan Endur Ngaga Rumah (19) enggau ke bukai.