Pengelandik dalam bidang STEM beguna dalam sektor kereja bekaul Industri
BINTULU: Pengelandik dalam bidang Sains, Teknologi, Injiniring enggau Matematik (STEM) sigi beguna dalam nangkup sektor pengereja pengawa bekaul enggau industri nya jemah ila di menua tu.
Menteri ba Opis Kepala Menteri (Integriti enggau Ombudsman) ti mega Kaban Kunsil Nengeri Jepak Datuk Talib Zulpilip madah, diatu ekonomi bepanggai ngagai sains enggau teknologi sereta matematik laban nama pan kereja jemah ila bekaul enggau injiniring sereta langkar nero pelin semua nya begunaka STEM dalam sekeda aspek.
Ku iya, bandingka enggau ubah gaya kereja sereta gaji besai ti diterima diatu enggau pemansang pengawa endang mekuh ngagai STEM, entara nya kereja ngelui pantai (industri minyak enggau gis) ti ngemeratka STEM.
“Sebarang (operasyen) kilang, sida lebih mekuh ngagai STEM. Baka kilang ngaga chip komputer di Kuching, kompeni tu begunaka 400 injinir dalam eletronik, elekterik, mekanikal, kimia, pakar kimia enti dibanding enggau mimit aja ungkup pengawa nyadi akauntan, pakar ekonomi tauka pengatur pengereja pengawa,” ku iya.
Iya madah munyi nya lebu ti bejaku bejadi Program Putra STEM@UPMKB ba Dewan Kuliah 2A Universiti Putra Malaysia Kampus Bintulu (UPMKB), kemari.
Berindik ari nya, ku iya, industri begunaka mayuh agi injinir lalu tau perati ba 20 taun ke deka datai gaya pengawa lalu gaji mega deka bisi ubah, ke lalu mega nyadi peluang ngagai kitai ngerapitka seraka endang dikearapka enggau mekuh ngagai mayuh agi pelajar STEM.
“Guna keterubah iya nya ungkup pemansang menua lalu ti kedua ungkup penyulut kitai empu berindik ari pemansang dunya iya nya begulai enggau STEM,” ku iya nambah.
Talib madah, ngenang baru rebak sida ukai mega jauh tinggal dalam bidang pelajar tang bidang ekonomi enggau akauntan deka nurun peminta dalam sektor kereja kelimpah ari servis pekara wang.
“Enti diperatika kereja ti besai gaji iya nya ke bepelasarka teknologi, injiniring enggau matematik. Aku enda madah (bidang) akauntan nya salah tang kitai patut mai rebak biak ngambika milih sereta nerenakka pengerindu sida dalam STEM ungkup pemansang menua sereta sida empu,” ku iya.
Dalam pekara tu, iya ngarapka program tu deka diteruska lalu anak rebak diatu patut ngerundingka chara ke manah dalam pilih sida ungkup pemansang laban Malaysia enggai tinggal kelebih agi raban bumiputera ukai nya asal lemi dalam bidang sains enggau ke bukai.
Berebak enggau nya, Direktor Kampus UPMKB
Dr Bujang Kim Huat madah,Putra STEM UPMKB kala diatur sebedau tu lalu sekali tu program nya digaga berurun agi lalu mungkur semua pekara.
Ku iya, program nya diatur ukai semina mekuh ngagai komuniti, sekula sereta bala nembiak ba Pelilih Menua Bintulu, tang mega deka dikerembai ngagai pelilih menua ti semak baka Sibu, Miri enggau ke bukai.
Iya nambah, sistem pelajar di Malaysia benung ba proses transformasyen ti mungkur semua pekara seriris enggau Pelin Pemansang Pelajar Malaysia 2013-2025 ke alai siti ari inisiatif besai pelin nya ngenegapka pelajar STEM.
“Berindik ari nya, pengeransing ngenegapka STEM ba nembiak sekula endang beguna laban sida inovator jemah ila. Menua ti inovatif ulih nyungkak pemansang idup ninting hari rayat lalu ulih besemekih dalam jeman ekonomi antarabansa,” ku iya.
“UPM nyadi universiti ke-132 ti pemadu nyulut dalam dunya ba rintai QS 2021 lalu universiti kedua pemadu nyulut dalam menua tu. Nya entara penyulut ti ngemegahka kitai semua ukai ari sukung siku orang aja, tang mungkur semua raban kampus, bala nembiak sereta sukung ari semua raban ke bukai,” ku iya.
Nya alai, ku iya, kitai ngarapka ba renggat sekula primari enggau sekondari ila deka ulih nampung pelajar ba UPMKB lalu nyadi pun dalam sama ngenyakahka program STEM.
Ku iya, sekalika pengajar tauka bala nembiak ke bisi penanggul ti bekaul, dikearapka ulih terus betelefon ngagai raban sida mutarka penanggul nya laban universiti tu ukai semina deka ngadaka graduet tang meri pemaik ngagai komuniti di kandang menua tu dalam timpuh pandak enggau panjai.
Sama bisi ba program nya Ketuai Strategik Korporat enggau Kaul UPMKB ke mega Direktor program tu Dr Mohammad Maulana Magiman, Dekan (Fakulti Kemanusiaan, Pengurusan dan Sains) UPMKB Prof Dr Jayum Jawan enggau Sapit Pemesai Opis Pelajar Pelilih Menua Bintulu Tero Buyel.
Program tu udah disereta nembiak ari Sekula Primari (SK) Orang Kaya Mohammad, SK Bintulu, SK Asyakirin, SK Agama Majlis Islam Sarawak Bintulu, SK Sungai Tisang enggau SK Jepak.