MARAKET TJ, STU udah nyuaka bantu ngagai SK Ulu Yong
KAPIT: Bisi dua buah organisasyen iya nya MARAKET TJ enggau Gempung Gerempung Pengajar Sarawak (STU) Kapit udah nemuai ngagai Sekula Primari (SK) Ulu Yong lalu nyuaka pemeri mata duit bela sepenyampau RM500 ngagai sekula nya ungkup bantu berindik ari buding nembiak lelaki ti udah angus kena lemai 12 Ogos tu tadi.
Chairman MARKET TJ Joseph Balayung enggau chairman STU Kapit Taira Teddy bisi nyuaka pemeri mata duit lalu udah diterima penulung kanan sekula nya, Garan Dagit.
Maya ba penusah nya, sebuah blok buding nembiak lelaki enggau sebuah kuarters pengajar ke digaga semak nya udah angus urung pukul 11.30 malam kena 12 Ogos tu tadi.
Ba endur belakang, ke kena empa api iya nya dua buah begunan di SK Ulu Yong urung pukul 11.30 pagi Hari Tiga kena 12 Ogos ti ngujungka sepuluh nembiak sekula ke diau ba buding enggau siku pengajar lenyau palan endur diau laban kuarters pengajar nya mega angus lengis.
Kededua begunan kayu nya ti digaga berimbai angus enggau jampat.
Nasit manah laban nadai siku pan bebadi maya ba penusah angus nya.
SK Ulu Yong digaga sebedau Hari Merdeka ba taun 1957. Bisi 91 iku nembiak enggau 13 iku pengajar nyengkaum kepala pengajar ba sekula nya.
Semina sebuah tu aja sekula primari ke bisi di ulu Sungai Yong. Bisi sepuluh buah rumah panjai ba semanjai Sungai Yong ke bela nganjung nembiak sida ngagai sekula nya. Entara rumah panjai tu iya nya Rumah Empawi, Rumah Manok Mancak, Rumah Memaloh, Rumah Lapek, Rumah Bilong, Rumah Untang, Rumah William Unchat, Rumah Janduk, Rumah Ngelai enggau Rumah Janan.