Kluster Syarikat Pembinaan Kuching udah abis kemari
KUCHING: Kluster Syarikat Pembinaan Kuching udah ditukuka nadai agi kemari, pengudah nadai kes baru diripotka dalam timpuh 28 hari ari hari bulan kes kepenudi.
Komiti Mutarka Penusah Ngenyit Nengeri Sarawak (JPBNS) madahka, Kluster Syarikat Pembinaan Kuching iya nya siti kluster ti ditemu kena 25 Julai 2020 ti mungkur dua kes COVID-19 ke udah ditukuka makmal.
“Kebendar, Kluster Syarikat Pembinaan Kuching ngaul dua pekereja peranak kandang menua tu ari sebuah kompeni ngaga begunan ti beoperasyen di Kuching.
“Kluster tu keterubah ditemu lebuh kes indeks kluster tu iya nya kes ke-578 beperesa kediri ba sebuah fasiliti pengerai peribit Kuching kena 11 Julai 2020.
“Asil ari peresa makmal iya ditemu positif peresa rTPCR COVID-19 kena 12 Julai 2020,” ku Komiti nya nengah penerang media kemari.
Berindik ari ripot kes tu, JPBNS madahka, kes kedua iya nya kes-649 udah ditemu asil ari aktiviti pengawa nyidi kontak kes keterubah.
“Kededua kes positif tu nadai ngayan sebarang kelai tauka simptom COVID-19 enggau sida mega nadai sejarah bejalai ngagai menua luar dalam timpuh 30 hari sebedau ditukuka positif
COVID-19.
“Sida udah diperubat ba Sepital Besai Sarawak. Kes kepenudi udah gerai sereta pansut ari sepital kena 5 Ogos 2020,” ku iya.
Ku iya nerang baru, nitihka penyampau semua, bisi 91 kontak ti nyengkaum 90 iku peranak kandang menua ti enggau siku peranak menua luar Malaysia udah diperesa.
“Asil ari pengawa peresa kontak tu, raban Opis Pengerai Nengeri Sarawak udah mujur nyidi siti agi kes (Kes649) positif COVID-19 lalu 90 iku ba pengawa beperesa ke bukai nya negatif COVID19,” ku iya.
Nitih ku iya, Kluster Syarikat Pembinaan Kuching iya nya kluster mit enggau udah mujur ditagang asil ari pengeregas sereta kerejasama entara Opis Pengerai Nengeri Sarawak enggau semua kaban JPBNS.
Berebak enggau nya, JPBNS mega madah bisi enam kluster agi aktif di nengeri tu ti mungkur 57 kes.
Antara nya Kluster Syarikat Kejuruteraaan (lapan kes), Kluster Mambong (tujuh kes), Kluster Sentosa (31 kes), Kluster PUI Melbourne (tiga kes), Kluster Pasar Satok (empat kes) enggau Kluster Seri Alam, Bintulu (empat kes).