Putarka isu pandemik COVID-19, diatu ukai maya bejalaika pengawa politik
KUCHING: Menteri Kanan Kereja Raya Datuk Seri Fadillah Yusof dekaka semua mekuh ngagai chara mutarka isu pandemik COVID-19.
Bejaku ba Program Merdeka@Komuniti 2020 ba Taman Sukma ditu kemari, Fadillah madahka diatu ukai maya ti engkeman enggau bejalaika pengawa politik.
Tang patut bebendar mutarka penanggul COVID-19 ke beguna sereta dikemeratka rayat diatu, ku iya.
“Ukai semina rayat ke betapi enggau pemar tu tang mega perintah sama ngasaika penanggul dalam pandemik COVID-19.
“Tang ba penyiru perintah enggau pengiruh ngagai semua rayat nyengkaum di Sarawak, kitai mujur mutarka isu tu enggau manah.
“Pia mega dunya udah ngenukuka Malaysia nyadi menua ti pemadu mujur dalam mutarka pandemik COVID-19,” ku iya ke mega Kaban Parlimen (MP) Petra Jaya.
Bejaku bekaul enggau program nya, tu diatur Opis Pemadah Malaysia Pelilih
Menua Kuching beserimbai enggau pengawa ngintu Bulan Kebangsaan 2020.
Batang tuju program tu dikena nerenakka runding patriotisme sereta talukka menua dalam bulan Kebangsaan.
Kelimpah ari nya, program tu mega dikena nyungkak pemereti ati sereta penyiru bekaul menua merdeka ba rayat Malaysia.
Setipak enggau program tu ti ngembuan tema taun tu iya nya ‘Malaysia Prihatin’, Fadillah ngarapka program tu deka nyapai juluk nya.
Sama bisi Menteri Muda ba Opis Kepala Menteri (Undang-Undang, Kaul Nengeri-Perintah Besai enggau Matau Projek) Datuk Sharifah Hasidah Sayeed Aman Ghazali.
Direktor Opis Pemadah Nengeri Sarak Suwadi Guliling, Ketuai Komuniti Lorong Piala 3 Taman Sukma Razuan Jili mega sama bisi enggau urung 100 iku peranak ari genturung pendiau nya.