Anang sepeneka ati ngubah papan tanda jalai enti nadai pemendar ari opis bekuasa
KUCHING: Nadai siku tauka orang bukai ulih ngubah papan tanda jalai nitih ke deka enggau peminta sida ti nadai dipesetuju tauka bulih pemendar ari opis bekuasa kandang menua tu.
Ketuai Raban Indu Parti Rakyat Sarawak (PRS) Datuk Seri Doris Sophia Brodie madahka, papan tanda jalai di nengeri tu ba baruh opis bekuasa kandang menua.
Nya alai, iya madah parti politik patut bejejaga ngambi enda ngelui tikas atur ke patut dalam bepolitik kelebih agi ti bekaul enggau isu bansa enggau jalai pengarap di Sarawak.
“Sarawak iya nya nengeri ti nyelai enggau lebih ari 28 raban etnik ti ngembuan mayuh macham pengarap, main asal, jaku enggau dialek.
“Nya kebuah, anang ngemeran tauka mai ulah bekaul enggau bansa ke enda manah baka ti digaga sekeda parti politik laban pengawa nya enda manah ngagai Sarawak sereta komuniti ti mayuh pupu bansa,” ku iya nengah penerang media kena Hari Lima ensanus.
Iya nerang sentang pengawa Raban Nembiak Sosialis Parti Tindakan Demokratik (DAPSY) Sarawak ti ngelekatka Jaku China ba sekeda papan tanda jalai ba ngelingi mengeri tu.
Ku Doris, Jaku Inggeris enggau Jaku Malaysia iya nya jaku rasmi di Sarawak, nyadi udah chukup ngena nya sekalika siti tauka kededua jaku tu ba papan tanda jalai nya.
Nitih ku iya, Jaku Inggeris iya nya jaku antarabansa enggau nyauka semua orang di serata dunya nemu bejaku sereta meretika nya.
“Taja kitai bisi pengandal deka meransang enggau ngelaluka penatai temuai ngagai nengeri tu, tang kitai enda ulih nangkup semua peminta kedeka sida.
“Hospitaliti enda semina ba papan tanda jalai aja tang ulih dipandang nengah main asal kitai ti ngembuan mayuh macham baka ari sukut pemakai, bebatak asur dalam pengarap enggau mayuh agi,” ku iya.