Peranak Rumah Chat nerima bantu ari mayuh bengkah ejensi

SIBU: Peranak Rumah Chat, Nanga Bilat, Julau ti dituntung penusah angus kena 17 Ogos empai lama udah nerima bantu pengasih ari bemacham raban, ti datai mandangka diri lalu mantu sida ke dituntung penusah nya.

Penusah rumah angus tu empai lama nyadi urung pukul 1 tengah hari, udah nganguska urung 80 nyentuk 90 peratus rumah panjai ti ngembuan 20 pintu sereta bisi 142 iku peranak.

Berindik ari penusah nya, 20 pampang ari Serakup Lions Region 2 enggau Region 3 Lions Clubs International 308-A2 datai meri bantu ngagai peranak Rumah Panjai Chat, apin lama ke udah.

Entara sida tu iya nya Serakup Lions Sibu Host, Sibu Mandarin, Sibu Seduan, Sibu Central, Sibu Pahlawan, Sibu Berjaya, Sibu City, Sibu Jaya, Sibu Sungai Merah, Sibu Bawang Assan, Sibu Nangka, Sibu Queensway, Sibu Lanang, Sibu Dudong, Sibu Rejang, Bintangor, Sarikei, Kapit, Song enggau Mukah.

Bantu ke diberi raban sida iya nya baka barang perengkaguna ninting hari enggau pemakai ke berega RM10,000 disuaka ngagai peranak rumah panjai nya.

Kelimpah ari nya, Gabenor Pelilih Menua 308-A2 Roland Chieng mega nyuaka bantu RM4,000 ungkup barang perengkaguna ninting hari enggau pemakai.