Ketuai komuniti ngembuan tanggungpengawa besai ngempung nembiak redak
Kerejasama peranak, pengelandik tuai rumah megai nembiak redak nentuka pemansang ba sesebuah rumah panjai: John Sikie
BINTULU: Bala ketuai komuniti ngembuan tanggungpengawa besai dalam ngempung komuniti ba baruh pegai sida ngambi terus mansang maju.
Menteri Muda ba Opis Kepala Menteri (UndangUndang enggau Adat Bumiputera) ke mega Kaban Kunsil Nengeri (ADUN) Kakus, Datuk John Sikie Tayai madahka, mansang tauka enda sesebuah rumah panjai nya bepanggai ngagai kerejasama peranak ti seati begempung enggau pemintar tuai rumah megai rumah panjai nya.
“Bala tuai rumah patut bejalaika tanggungpengawa baka ke udah ditetapka perintah nengeri nitihka dalam setipikit sida.
“Siti ari pengawa sida iya nya nyadi orang tengah ungkup rayat di rumah panjai enggau ejensi perintah,” ku iya.
Iya madah munyi nya ba Pengerami Ketuai Begulai enggau Rayat nyerumba pengawa bejadika Jalai Semin Rumah Jubang Ilin, Pengkalan Lobang, Bawan, Mukah empai lama ti udah.
Ku iya, tuai rumah mesti nyadi mata enggau pending sereta kerejasama enggau perintah ti megai menua. Nya alai ku iya, patut diterang taja pemansang ulih chakah dipejalaika ba sesebengkah kandang menua nya tang enda ulih dipejalaika serentak laban kandang pengentap rumah peranak nengeri tu besai.
Taja pia ku iya, pemansang ba kandang menua ulu ba endur nya udah bisi dipeda.
“Enti suba enti deka ngagai Pengkala Lobang, Hulu Bawan mesti ngena perengka pengangkut sungai tang diatu tebal agi endur nya udah bisi bekal elekterik, jalai alun enggau ai beresi.
Ku iya, kelimpah nyendia perengkaguna pemun, peranak patut nemu berunding chara dikena nyungkak tikas ekonomi nengah aktiviti betanam betupi enggau chara komersial sereta betanamka utai ti bisi peminta ke tinggi ba dagang.
Ku iya nerang, perintah nengeri Sarawak nengah projek Program Transformasyen Menua Pesisir (RTP) mayuh mantu nyendiaka infrastruktur pemun nyengkaum ngemanahka jalai alun ngagai rumah panjai, ngerataka taba rumah panjai, palan endur ngengkahka entukar sereta jalai ba mua rumah.
“Kena taun 2020, RTP di sitak Bawan iya nya Rumah (RH) Johnny, Rh Garit, Rh Juti, Rh Dibit enggau Rh Minggu ti mungkur projek
Bala tuai rumah patut bejalaika tanggungpengawa baka ke udah ditetapka perintah nengeri nitihka dalam setipikit sida.
Datuk John Sikie Tayai
Menteri Muda ba Opis Kepala Menteri (Undang-Undang enggau Adat Bumiputera)
ngaga palan ngengkahka entukar, jalai mua rumah enggau ngemanahka jalai ngagai Rh Latit enggau Rh Gajah.
“Ungkus penyampau RTP ungkup taun 2020 sitak Pengkalan Lobang, Bukit Dinding, Sungai Duan, Bawan iya nya RM1.3 juta,” ku iya.
Ku iya, Padang Futsal deka digaga ba Bukit Dinding enggau Jalan Bukut/Ladang emnpat taun tu nyengkaum di Pengkalan Lobang.
Ba awak ke sama ku iya, sebuah menara komunikasyen
deka digaga ba kandang menua Pengkalan Lobang.
Ba pengawa nya John Sikie bisi ngungkupka geran Projek Mit Menua Pesisir (MRP) sepenyampau RM20,000 ngagai Komiti Pemansang enggau Pengelikun Genturung Pendiau (JKKK) lalu RM8,000 ungkup Biro Indu Rh Jubang Ilin.
Sama bisi datai Tuai Rumah Jubang Ilin, Penghulu Richard Empaling, Kunsilor Nelson Chuat Glong enggau Kunsilor Augustine Manggang.