Perintah Sarawak udah ngungkupka RM988,680 dikena ngaga Stadium Mini di Kampung Seberang Sarikei
SARIKEI: Sepenyampau RM988,680 belanja udah diagih kena ngaga Stadium Mini di Kampung Seberang Sarikei, ku Menteri Muda Perambu Mengeri, Atur Tanah enggau Rampa Menua, Datu Len Talif Salleh.
Len madahka, pengawa ti dipejalaika perintah Sarawak tu iya nya deka ngenegapka gaya idup ti regas ba raban komuniti enda ngira renggat umur, kelebih agi ba kandang menua ulu enggau menua pesisir.
“Stadium Mini tu ila deka disikap enggau perengkaguna palan endur duduk ke bisi atap ke ulih ngundan kapasiti 200 iku orang dalam siti timpuh sereta perengkaguna ke bukai ti ulih meri pengelantang ngagai bala temuai.
“Perambu deka ngangkatmanah kompleks tu udah diperambu kami enggau digaga bererenggat kenyau ari lapan taun ke udah lalu diatu nya udah nyapai tikas ke amat ngemuaska ati maya diatu.
“Pemisi prasarana tu udah mayuh meri pemaik ngagai pemansang komuniti ba kandang endur tu lebih agi dalam meransang raban biak enggau tuai ba aktiviti ke bepengerai lalu ulih ngenegapka sosial ekonomi peranak kandang menua nya ti nemu ngena peluang tetiap aktiviti ke udah diatur ba palan nya dikena nyungkak penatai pemisi tambah ungkup sida,” ku Len.
Iya madah munyi nya maya Pengawa Serah Taba Projek ari Opis Kaunsil Pelilih Sarikei (MDS) ngagai kunteriktor Litomidas Sdn. Bhd., kilah ensanus.
Ku Len, ba keterubah, palan tu semina sebuah padang main bol tang nengah sukung penuh lalu perambu silik begulai enggau peranak sereta ejensi perintah ba kandang endur tu, nya udah ulih dikemanahka ari renggat ke renggat nyadi manah agi.
“Kami pechaya enggau ngaga perengkaguna palan alai duduk ke bisi atap ba endur tu ila deka mai siti landskap ke ulih matak mayuh agi komuniti enggau Gerempung Ukai Dikuasa Perintah (NGO) ngatur aktiviti lumba enggau main sereta palan endur ngelantangka ati ba ditu.
“Empas ari pengawa ngatur aktiviti baka tu deka mai komuniti kitai regas agi dalam aktiviti lumba enggau main sereta program bukai ke bekaul.
“Nengahnya,kamipechaya juluk menua deka nempa raban ari segenap serak umur regas dalam aktiviti lumba enggau main lalu numbuhka komuniti ti bepengerai ulih dijapai enggau mujur,” ku Len nyemetak.