SMC deka ngemesaika Pasar Ujung Minggu Jalai Indah dikena nambah palan dagang
SIBU: Opis Kaunsil Mengeri Sibu (SMC) merambu deka nyemin kandang Pasar Ujung Minggu Jalai Indah kena bulan baru, dikena ngemesaika palan alai kedai mit sereta peminta bedagang ba ditu ke majak niki.
Berindik ari nya, ku Chairman Komiti Mendam Orang Dagang Mit Makit Sentral SMC, Kunsilor Albert Tiang madah, tu deka ulih nangkup urung 20 kedai mit ti ngembuan pemesai enam kaki enggau empat kaki.
“Kelalu mayuh peminta (dikena minta pemendar bedagang ba makit tu). Tu kebuah kami deka ngaga sereta nyendiaka mayuh agi lot alai bedagang dikena nangkup peminta nya.
“Pengudah lot alai bedagang tu tembu ila, SMC deka betelefon ngagai sida ti udah ngerejista diri(dikena minta pemendar bedagang),” ku iya madah ngagai pengarang berita empai lama.
Nitih ku Tiang, urung 180 iku orang dagang ti bedagang ba Pasar Ujung Minggu tu.
“Ari penyampau tu, urung 20 iku (orang dagang) bedagang enggau nadai pemendar. 160 iku ke bukai udah bisi pemendar lalu 15 ari penyampau tu iya nya orang bejual Tamu,” ku iya nambah.
Nangkanka tu, iya madahka diri berasai gaga ati ke pengasi entara raban dagang sereta penguna ti ngemeranka Prosedur Operasyen Standard (SOP) enggau manah.
Bekaul enggau pekara senentang sekalika Atur Nagang Pemindah Mulaika Pemanah (PKPP) deka abis kena 1 September, Tiang madahka SMC deka nitih sereta nganti pemutus ari Komiti Mutarka Penusah Ngenyit Nengeri Sarawak (JPBNS) aja.
Senentang gaya trafik ba Pasar Ujung Minggu ditu, endang bisi sekut mimit tang ku iya tu semina nyadi ba timpuh ke pandak.
Ketegal palan alai ngengkahka entukar ba endur komersial enda chukup, sekeda raban penguna nyau ngengkahka entukar sida ba tisi jalai tang enda ngempang pejalai trafik ba jalai alun.