SUPP Dudong, Bukit Assek bebendar deka mutarka penanggul ampuh bah ti suah nyadi di Kampung Usahajaya Baru
SIBU: Penusah ampuh bah ti suah nyadi lebuh ti bisi ujan ba Kampung Usahajaya Baru, Sentosa ditu nerima perati ari Parti Sa’ati Rayat Sarawak (SUPP) Pampang Dudong enggau Bukit Assek.
Chairman SUPP Pampang Dudong Wong Ching Yong madah, seduai iya Chairman SUPP Pampang Bukit Assek Dato Chieng Buong Toon udah ngulu siti pengawa berandau enggau peranak genturung pendiau nya, ke mega digulu Chairman Komiti Pemansang enggau Pengelikun Genturung Pendiau (JKKK) Usahajaya Baru, Sentosa Mohd Ali Serani ba sebuah hotel ditu kena Hari Enam (kilah ensana).
Ku iya, tuju program berandau tu iya nya dikena berundingka semua isu peranak ba genturung pendiau tu, tebal agi penanggul ampuh bah.
“Entara isu ke pemadu besai dikerandauka dalam aum tu iya nya penanggul ampuh bah ti ditapi peranak genturung pendiau tu pengudah hari ujan bangat ngelamatu,” ku iya madah ngagai pengarang berita ditu, kemari.
Ku Wong, kena bulan nyin kemari, peranak ba genturung pendiau nya napi penusah ampuh bah ke pemadu balat kenyau betaun ke udah.
“Tu berindik ari sekeda faktor meteorologi baka ujan bangat, ai pasang besai ari Sungai Rejang enggau pengawa ngurangka tikas peninggi ai ari Tekat Ai Bakun ti nyadi seretai dalam seminggu.
“Ampuh bah besai tu ngujungka pengidup ninting hari peranak ba genturung pendiau nya tekeruga,” ku iya ke mega Sapit Chairman Opis Pelilih Kandang Menua Pesisir Sibu (SRDC).
Ku Wong nambah, seduai iya Chieng udah merati enggau serius senentang penanggul nya enggau silik.
“Kami udah besetuju deka meresa sereta matau begulai enggau Opis Kaunsil Mengeri Sibu (SMC) sereta Opis Parit enggau Entali Ai (JPS) Sibu dikena mansik sekeda palan ti patut diputarka ba genturung pendiau nya,” ku iya.
Ba program berandau nya, iya madahka Komiti Pemansang enggau Pengelikun Genturung Pendiau (JKKK) dia udah dipadahka bekaul enggau perintah nengeri ti udah ngemendarka Perambu Projek Mutarka Penusah Ampuh Bah ti beungkus RM25 juta, dikena mutarka penusah ampuh bah ba Kampung Sentosa.
Nya alai, ku Wong, siti program berandau deka diatur entara JPS Sibu enggau peranak genturung pendiau nya enda lama agi.
“Berindik ari tu, ngarapka peranak ba genturung pendiau nya ulih meretika tuju Projek Mutarka Penusah Ampuh Bah ti beungkus RM25 juta tu, pengudah datai ba program ti diperambu nya ila,” ku iya.