Anang nangi ngerejista dagang enggau chara ti sah: Fatimah
MUKAH: Orang dagang ba raban indu enda ibuh nangi ngerejista dagang sida enggau chara sah.
Menteri Pengintu Pengelantang Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah madahka, aktiviti dagang belisin ulih mantu sida maya napi pemar.
“Bantu ungkup orang dagang diberi nitihka penerang ke bisi nengah aktiviti dagang ke berejist,” ku iya maya Program Lisin Dagang Orang Dagang Indu Sarawak #PUWaS@Dalat di Stadium Perpaduan Dalat ensanus.
Nitih ku iya, ukai semina nya aja, bantu ari ejensi bukai mega ngena chara ke sama.
Nya alai, iya minta ngambi orang dagang raban indu nemu pemesai guna ngerejista dagang sida enggau chara sah.
Iya nemu mayuh raban orang dagang indu nadai ngerejista dagang sida maya sebana enda bulih bantu perintah nyadi orang dagang pengudah COVID-19.
Kelimpah bantu terus ngagai orang dagang, Opis Orang Indu enggau Ruang
Bilik ku nya udah minta geran sepenyampau RM2 juta ti sebedau tu nengah sukut perengka ti ditukar ngagai mata duit puku.
Taja pia, ku Fatimah nya besekat ngagai ba penyampau geran semina RM2,000 aja lalu 1,000 iku aja ke tau bulih pengudah peminta dipilih baru.
Berebak enggau nya, Fatimah mega meransang bala indai ngambi naruh duit ba i-Suri tauka i-Saraan.
“Enti kitai ulih naruh duit taja mimit, nya mega ungkup pengidup kitai dudi hari ila,” ku iya.
Sama bisi datai Direktor Opis Indu enggau Ruang Bilik Sarawak Noriah Ahmad, Pemesai Pelilih Dalat Kueh Lei Poh, Direktor Pampang Lembaga Hasil Dalam Negeri (LHDN) Sibu John Tensey Peter Raig, Ketuai Seksyen Caruman dan Kewangan, Kumpulan Wang Simpanan Pekerja (KWSP) Sarawak Irma Jalil enggau Seksyen Pemansang Kapasiti, Opis Menteri Dagang Antarabansa enggau Industri, Terminal Industri enggau Pemansang Orang Dagang Sarawak, Mas Ammar Azhan Saie.