Nembiak rebak baru diperansang nyereta aktiviti volunteer, nentuka pupu bansa ulih dibantu
KUCHING: Perintah Sarawak meransang nembiak rebak baru ngambi nyereta dalam aktiviti volunteer kena nentuka tetiap serak pupu bansa ulih dibantu.
Menteri Muda Pekara Islam enggau Dewan Bandaraya Kuching Utara (DBKU) Datuk Dr Abdul Rahman Junaidi madahka, nya ulih dipandang nengah penumbuh Sarawak Volunteer ti mungkur mayuh rebak biak.
Pia mega ku iya, penyereta rebak biak dalam akitiviti volunteer mega beguna amat dikena nyeliahka sida ari tepejuh ba pengawa ke enda manah.
“Kami seruran meransang aktiviti vounteer ba raban komuniti dikena nyungkak pemereti ati ngemeranka ulah sama betulung enggau pangan diri.
“Nya alai, perintah Sarawak mega mekuh ngagai aktiviti bansa tu nyentuk bisi penumbuh Sarawak Volunteer,” ku iya pengudah nerima penemuai Gerempung Volunteer Pengintu Pengelantang Kuching (PSKK) di Palan Servis Kaban Kunsil Nengeri (ADUN) Pantai Damai ditu, bedau lama udah.
Dr Abdul Rahman ke mega Menteri Muda Bekal Ai madahka, dikena matak penyereta ari raban rebak biak, tetiap aktiviti volunteer mega patut diselitka enggau program ti ngelantangka ati sereta nitih jeman maya diatu.
“Tetiap aktiviti ke deka diatur mesti dilangkar sereta diadu manah ngambi ulih meri pemaik ngagai komuniti,” ku iya.
Berebak enggau nya, iya muji PSKK laban udha mujur ngatur mayuh bengkah aktiviti pengintu pengelantang enggau volunteer kenyau penumbuh nya tiga taun ke udah.
ADUN Pantai Damai nya ngarap PSKK deka terus ngelangkar aktiviti ke ulih matak pengerindu raban nembiak nyereta nya.
“Aku pechaya mayuh raban nembiak deka ngambi bagi dalam aktiviti volunteer tang nadai ngembuan peluang tauka kurang penerang ti ngujungka sida nadai nyereta ngelama tu,” ku iya.
Sama bisi datai Chairman Gerempung Volunteer Pengintu Pengelantang Kuching Zakiah Ahmad.