Anjung peminta guna peranak genturung pendiau, ngambika servis ulih diberi enggau jampat
SADONG JAYA: Kenataika lengkas peminta ke bekaul enggau guna peranak genturung pendiau ngambi ulih dikemendar lalu dipejalai.
Pekara nya nyemetak dipadah Menteri Dagang Temuai, Seni enggau Budaya (MOTAC) Datuk Seri Nancy Shukri ke deka rayat ngelengkaska semua peminta ngambika servis ke diguna nya ulih diberi jampat ngagai sida.
“Kitai enda nemu kemaya pengawa bepilih deka diatur tang ketegal nyadi Pengari Rayat (Kaban Parlimen) aku minta rayat ngelengkaska semua peminta tauka minta deka servis nya ulih diberi jampat ngagai sida,” ku iya.
Iya madah munyi nya pengudah nyuaka chek Bantu Duit Turu Aktiviti Program Projek Khas (SPP) Kaban Parlimen Batang Sadong ba baruh Belanja Kepala Menteri ngagai 12 Komiti Pemansang
enggau Pengelikun Genturung Pendiau (JKKK) sereta Gerempung Ukai Dikuasa Perintah (NGO) di Sadong Jaya nyengkaum Zon Pangkor nengah penyampau semua ungkus RM43,000 ditu ensanus.
Ku iya, komuniti patut sedia nyikap diri enggau ngiga peneleba dulu nyadika malin enggau tunjuk ajar ngambi nama ke diperambu maya diatu dipejalaika lengkas.
“Nya kebuah, semua bala ketuai komuniti mesti mantu perintah (perintah besai enggau nengeri) ngambi pekara ke guna rayat sekalika ba pemansang infrastruktur tauka bantu ekonomi ulih dipinta sereta dikenataika lengkas,” ku Kaban Parlimen Batang Sadong nya.
Berebak enggau nya, Nancy mega bisi meri bantu ke sama ngagai JKKK enggau NGO di Simunjan enggau penyampau semua ungkus
RM50,000 ba baruh Agih Belanja Kepala Menteri.
Ku iya, perintah seruran ngiga chara dikena mantu ngemanahka tikas pengidup rayat.
“Ambika chunto, bisi 109 buah rumah di sitak DUN Sadong Jaya, Simunjan enggau Gedong ba baruh Parlimen
Batang Sadong udah tembu diangkatmanah ngena agih belanja sepenyampau RM500,000 ari perintah nengeri, ku iya.
Kelimpah ari nya, iya mega bisi ngulu program MOTAC begulai enggau peranak Sungai Rian, Kepayang di Ulu Simunjan matau potensial dagang temuai ba palan ngelantangka ati enggau rekreasyen ba endur nya.
“Sungai Rian, Kampung Kepayang, Simunjan entara kandang menua ke agi bedau diserungkai tang ngembuan potensial dikemansang nyadi produk eko-dagang temuai.
“Nya alai, aku minta Komiti Pemansang Palan Rekreasyen Sungai Rian, Kepayang, Simunjan ti mungkur empat iku Tuai Rumah, ngenataika peminta ba guna pemansang dagang temuai seni enggau budaya kena mantu ngerichahka agi sektor eko-dagang temuai,” ku iya nyemetak.
Ku iya nambah, pia mega ari sukut asil pengelandik jari ti ngembuan pengelebih sereta pemanah nya empu ti bisi elemen seni budaya raban bansa Iban ari Gempung Raban Orang Indu Sarawak (PPWS) ke ulih diangkat nyadi produk dagang temuai.