Langgur penemu KKM ngambika PKPP dilanjarka diterima manah
Langgur penemu KKM ti dikenataika ngagai Kaunsil Pengelikun Menua (MKN) tu mega disukung mensia mayuh
KUCHING: Langgur penemu Opis Menteri Pengerai Malaysia (KKM) ngambika pentin Atur Nagang Pemindah Mulaika Pemanah (PKPP) dilanjarka endang patut laban menua agi napi pengelekai COVID-19.
Nyadi rayat Malaysia aku nerima manah langgur penemu KKM ngambi ngelanjarka timpuh PKPP pengudah 31 Ogos ngagai siti timpuh agi.
Abang Abdul Aziz Abang Draup
Langgur penemu KKM ti dikenataika ngagai Kaunsil Pengelikun Menua (MKN) tu mega disukung mensia mayuh, kena nentuka menua tu endang amat likun sereta nadai agi virus tu.
Ku Abang Abdul Aziz Abang Draup, perintah udah ngambi bemacham atur enggau undang-undang kena mutarka virus tu, tang kes positif mengkang berampit.
“Nyadi rayat Malaysia aku nerima manah langgur penemu KKM ngambi ngelanjarka timpuh PKPP pengudah 31 Ogos ngagai siti timpuh agi.
“Tu laban menua kitai agi napi pengelekai virus tu ke nyengkaum dalam menua enggau menua luar
“Enti PKPP diketuka, kitai irauka penyakit tu ngelekai baru ba rayat kitai,” pia ku iya lebuh ke dirandau Utusan Borneo.
Langgur penemu KKM nya mega bela disukung Elizabeth Noi, siku pengajar ke diatu ngajar ba sebuah sekula sekondari di Sabah.
Ba Elizabeth, taja pan gaya COVID-19 dipeda majak manah, tang bedau abis endar lalu rayat anang ilap.
Tu enda ulih dijangka lalu enti PKPP diketuka kelalu tumu, kitai irauka nya deka ngelekai baru.
“Tang enti PKPP dipajakka, pengelekai nya ulih ditagang,” ku iya.
Ba penemu Tr Sangi Abu, langgur penemu KKM ngelanjarka PKPP denda patut enti beratika gaya COVID19 diatu.
“Kes COVID-19 apin abis endar. Nya alai manah agi PKPP dilanjarka ngagai siti timpuh agi.
“Nya engka deka ngenusahka rayat, tang ke pengelikun enggau pengerai rayat, endang manah agi dilanjarka, ku iya.