16 iku dikompaun, tujuh iku peranak menua luar ditan nanjang atur SOP
KUCHING: Ketegal ngelanggar prosedur operasyen standard (SOP) ti udah ditetapka maya Atur Nagang Pemindah Mulaika Pemanah (PKPP), bisi 16 iku kena kompaun enggau tujuh iku peranak menua luar ditan di mengeri tu kena Hari Minggu.
Ketuai Polis Pelilih Kuching ACP Awang Din Awang Gani madah, semua sida tu iya nya 13 iku lelaki enggau 10 iku indu ke beumur entara 18 ngagai 26 taun.
Ku iya nerang, kompaun nya ditinggang ngagai sida maya operasyen meresa ti dipejalaika raban Balai Polis Sentral ti betuaika ASP Ahmad Abang enggau Unit Operasyen Polis ba sebuah palan mensia mayuh di Tebing Sungai Kuching enggau ba sebuah premis pemerindang di Jalai Song.
“Maya meresa nya, bisi 13 iku ba palan mensia mayuh enggau tiga iku agi ngelawa premis pemerindang nya ditemu ngelanggar atur PKPP ke alai semua sida nadai ngemeranka SOP seraka fizikal baka ke udah ditetapka perintah.
“Ba pengawa meresa nya mega, polis udah nangkap sereta muka keretas pansik ngagai tujuh iku peranak menua luar ke bisi ba endur nya laban ngereja pengawa salah ke sama,” ku iya dalam penerang kemari.
Ku iya nambah, berindik ari nya, 16 individu peranak kandang menua tu dipinta datai ngagai Indu Opis Polis Pelilih (IPD) Kuching laban udah ngereja penyalah ari baruh Atur 3, Atur Nagang Penyakit Berampit (PPPPB) (No 7) 2020 iya nya enda ngasika SOP ti ditetapka.
“Semua 16 iku nya dikompaun sereta mesti mayar ba Opis Pengerai Pelilih Kuching dalam timpuh 14 hari enggau penyampau kompaun RM1000 tetiap siku,” ku Awang Din.
Pia mega, ku iya nerang tujuh iku peranak ari menua luar ditan ngambi dipansik lalu polis deka ngaduka keretas pansik ti dibuka ngagai Sapit Luyar Nengeri Sarawak kena ngulihka gerah dawa bechara ba Kort.
Nangkanka nya, iya madah, taja polis suah meri jaku tangkan nengah media rama sentang atur ngasika SOP seraka fizikal tang agi bisi sekeda komuniti enda nitih enggau enda ibuhka jaku gerah ke udah dipadah.
“Taja kompaun dikeluarka nyauka ninting hari ngagai mensia mayuh ti enda ngasika pentin PKPP tu sereta jaku tangkan ti disadung nengah media rama nyadika chara perintah kena nentuka semua rayat Malaysia seruran bejejaga,tang mensia mayuh dipeda majak ilap sereta enda ngasika SOP seraka fizikal.
“Enggau kes ke pemadu baru ti diripotka di nengeri tu, mensia mayuh patut sama besaup mutuska rentayan pengelekai COVID-19,” ku iya nyemetak.
“Iya mega ngansak mensia mayuh ngambika enda kelalu enda beratka fenomena tu ke udah nyadi pandemik.
Nya alai, iya ngarap mensia mayuh kelebih agi pengemeran premis enggau penguna seruran nitihka atur ari perintah dalam timpuh PKPP ngambi ngasika SOP seraka fizikal kena nagang pengelekai COVID-19.