Kaban PBB Spaoh dipinta nyikap diri napi PRN
Sida mesti nentuka kerusi tu mengkang diempu perintah nengeri GPS pengudah PRN ila: Uggah
SPAOH: Kaban Parti Pesaka Bumiputera Bersatu (PBB) ba sitak Bukit Saban dipinta nyendiaka diri napi Pengawa Bepilih Nengeri (PRN) ke deka datai.
Penyandang kerusi Kunsil Nengeri (DUN) nya, Datuk Amar Douglas Uggah Embas madahka bisi sekeda parti politik mandangka peneka bediri minta pilih ba sitak nya nyengkaum Parti Sarawak Bersatu (PSB) enggau Parti Keadilan Rakyat (PKR).
Uggah ke mega Sapit Kepala Menteri madah munyi nya lebuh bejaku ba mua bala kaban parti ari empat ranting PBB di Spaoh kena Hari Minggu nyin tadi.
“Kaban kitai mesti nyikap diri. Kelimpah ari dua parti politik ke disebut aku nya, engka bisi parti bukai ke deka nguji nasit.
“Nya alai, pengawa kita ke pemadu beguna iya nya nentuka kerusi tu mengkang diempu perintah nengeri GPS (Gabungan Parti Sarawak) pengudah pengawa bepilih (nengeri) ila,” ku iya.
Ku Uggah, pemujur GPS menang di Bukit Saban deka nyadi siti agi penambah ti berega ngagai majoriti perintah GPS ngambika terus merintah nengeri Sarawak.
“Politik Sarawak amat tegap...Kitai bisi ketuai ti chukup manah ke nyadi Kepala Menteri, iya nya Datuk Patinggi Abang Johari Tun Openg.
“Iya amat keran ati deka meda Sarawak maju sereta lantang, iya suah nemuai ngagai semua bagi menua
Kaban kitai mesti nyikap diri. Kelimpah ari dua parti politik ke disebut aku nya, engka bisi parti bukai ke deka nguji nasit.
Datuk Amar Douglas Uggah Embas
Penyandang Kerusi DUN Bukit Saban
tauka kandang menua di nengeri tu deka nentuka pemansang enggau pengelantang nengeri ulih dikunsika enggau rayat.
“Iya mega udah magi Sarawak ngagai tiga ejensi batang pemansang ti nyadi strategi kena meda semua pemansang ti dipejalaika nengah chara sistematik,” ku iya.
Ku Uggah baru, diatu siti ari juluk ati Abang Johari iya nya nempa Sarawak nyadi kuasa betanam betupi di menua tu.
Abang Johari ku iya, dekaka Sarawak nyadi pengeluar enggau pengeksport besai pemakai nyerumba taun 2030.
Ku Uggah, reti nya peranak menua pesisir tebal agi orang bumai bekebun, betupi jelu enggau berikan deka bulih penatai pemisi ari tanah tauka pengawa ke dikereja sida empu.
“Nya alai, semua mesti nyaup GPS ngambika menang besai ungkup Abang Johari ke nyadi ketuai ti ngemeranka polisi ti mungkur semua, ngambika majak ngiring kitai.
“Diatu, kita ulih meda bisi sekeda orang udah belabuh bekimpin, besemayaka bulan enggau bintang, ngichaka menang, tang enti alah, sida lalu lesap.
“Kami ari perintah, seruran gawaka rayat baikka nya maya pengawa bepilih tauka hari bukai,” ku iya.
Sentang kerusi Bukit Saban, Uggah madahka udah bisi chalun ngabas rayat madahka pemansang di Bukan Saban semina di Penom enggau Gensurai aja.
“Tu siti pemula besai. Projek pemansang udah lama dipejalai sereta dikerembai ke pemaik semua.
“Kitai sama nemu STOLport ke beungkus RM108 juta deka digaga ba Bebuling. Tu meri pemaik sereta ngemudahka sekeda potensial ke besai ngemansutka pemakai Betong/Sarikei. Nya ukai projek besai tauka ‘mewah’ baka ti dipelabaka.
“Semua komuniti ti ngereja pengawa betanam betupi deka bulih pemaik ari nya,” ku iya.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah, sekeda projek deka dikemansangka ba sitak nya baka Kompleks Lumba enggau Main Spaoh ti baru ke beungkus RM14 juta, projek waterfront Spaoh (RM6.2 juta), pasar baru (RM5 juta) enggau jematan Spaoh ke baru (RM30 juta).
Kelimpah ari nya ku iya, Jalai Spaoh deka diangkatmanah lalu Sekula Sekondari (SMK) Spaoh mega deka dikemanahka.
“Bulan siti nyin tadi (Julai) kitai sama udah meda pengawa bejadi Palan Betanam Betupi Spaoh ti baru ke beungkus RM3.5 juta,” ku iya.
Ku Uggah baru, tebal agi 92 rumah panjai ba sitak nya udah datai jalai magang enggau perengkaguna baka bekal ai enggau elekterik.
“Taja pia, udah tentu kitai enggaui ngetuka naka tu tauka puas ati. Fokus kami nangka tu iya nya mantu rayat ngulihka penatai pemisi nengah pengawa betanam betupi ke engkeman ba sida.
“Penyakal deka mansutka mayuh bengkah jaku tuduh sereta pemula, ketegal deka ngamahka nama aku enggau perintah nengeri.
“Aku pechaya pengundi deka nemu pengamat... Kaban PBB kitai mesti nyikap diri madah pekara ke betul sereta amat,” ku iya.
Berebak enggau nya, Uggah ke mega Sapit Presiden PBB sereta Chairman PBB Bukit Saban, madahka Konvensyen PBB ke mit (mini) deka diatur dalam bulan September ti deka datai.
Ku iya, nya Beliau entara empat konvensyen ti diperambu di nengeri lalu ukai siti konvensyen besai baka ke kala diatur sebedau tu.
“Kitai enda tau ngatur konvensyen besai diatu laban nangika ari sukut pengerai ketegal pandemik COVID19.
“Kepala menteri (Datuk Patinggi Abang Johari Tun Openg) ke mega presiden parti dipelaba bejadika konvensyen mini tu,” ku iya.
Dulu ari nya, Sapit Chairman PBB Bukit Saban, Abg Suhordia Abg Zaini madahka kaban PSB udah berengkah ngabas rayat dalam sitak nya.
“Diatu bisi dua raban, tetiap raban nya sama bela mantaika chalun ke dipilih sida empu,” ku iya.
Sama bisi datai, Sekretari Politik Kepala Menteri, Dr Richard Rapu, Kaban Kaunsil Tetinggi Indu PBB, Natasha Nasa Uggah enggau Ketuai Indu PBB Bukit Saban, Nahariah Mohd Spawi.