Jamit udah bejadi kimpin Ngitang Jalur Gemilang ba Pasar Baru Kapit
KAPIT: Kaban Kunsil Nengeri Bukit Goram, Jefferson Jamit Unyat kena pagi Hari Satu udah bejadi ‘Kimpin Ngitang Jalur Gemilang ba Pasar Baru Kapit. Iya bisi nyadung menira menua sereta sengkabung idung enggau mulut ngagai kededua pengempu kedai kopi enggau restoran ke mega kaban Gerempung Pengempu Kedai Kopi enggau Restoran (KCROA).
Pengerami patriotik nya aktiviti ke diatur Opis Pemadah Kapit nengah kerejasama enggau KCROA.
Pemesai Pemadah Kapit Abdul Aziz nerangka kimpin ‘Kibar Jalur Gemilang’ kena nerenak pengandal patriotik enggau nasional ti sayauka menua. Ku iya nyemetak kitai semua patut temegah ati laban kitai rayat Malaysia ulih begulai beserakup enggau pengelantang taja pan mayuh pupu bansa enggau jalai pengarap di Malaysia.
“Beserimbai enggau bulan merdeka mayuh bengkah aktiviti patrotik diatur kena ngintu pengerami nya. Ke beguna amat iya nya kitai semua mesti ngembuan penaluk enggau temegah ati nyadi rayat Malaysia ti idup dalam pengelantang enggau penyerakup taja pan ngembuan mayuh pupu bansa enggau jalai pengarap,” ku Aziz.
“Sekumbang ngintu bulan merdeka, kitai patut tegap enggau pengeran patriotik sereta taluk ke menua. Sama seati kitai nyaga penyerakup enggau pengelantang ba menua ngambika Malaysia bediri tegap ngagai tikas ti lebih tinggi. Siti chara iya nya nengah nambaika menira nasional nyadika kelai perintah enggau menua merdeka,” ku iya.
Kemari, KCROA udah ngatur kimpin nya di Kapit lalu kilah ensana kena Hari Minggu ngatur kimpin ke sama ba Pasar Song.
Sama bisi datai ba Pasar Song iya nya Sekretari Politik Kepala Menteri Lidam Asam enggau Ambrose Abong Bugek ke mega Penulung Khas Menteri Dalam Nengeri enggau Pekara Penguna Datuk Alexander Nanta Linggi begulai enggau chairman Gerempung Ma Tian bejadika pengerami nya lebuh sida nyadung menira Malaysia ngagai kaban KCROA.