SMC nyambut manah pengawa raban serakup mantu ngemanahka taman komuniti di Sibu

SIBU: Opis Kaunsil Mengeri Sibu (SMC) nyambut manah pengawa sekeda raban serakup enggau ketuai raban bansa ti deka mantu ngaga taman komuniti di Sibu ditu.

Chairman Komiti Mendam Nyaga Begunan enggau Nyaga Pemanah Rampa Mengeri SMC, Kunsilor Joseph Chieng madahka pengawa tu kena numbuhka mayuh agi taman komiti ungkup mensia mayuh alai ngelantangka ati.

“Di Sibu, kitai ngembuan 15 buah ‘taman persahabatan’ ti udah digaga raban serakup nengah kerejasama enggau SMC ti nyadi raban ari opis bekuasa kandang menua (PBT).

“Sebuah agi taman komuniti deka digaga nengah kerejasama Serakup Foochow Sibu. Palan ti dipilih iya nya ba Jalai Gambir lalu kami udah ngabas endur nya,” ku iya lebuh dikerandau pengarang berita pengudah ngabas Taman Persahabatan ba Permai ditu, empai lama.

Taman Persahabatan ba Permai nya digaga kena Jun 2003 ti dipejalaika Serakup Kaul Diri Sekaban Kandang Menua Tengah Sarawak (Persatuan Persahabatan Wilayah Tengah Sarawak).

Nyidi enggau lenak agi senentang penanggul ba Taman Persahabatan,

Chieng madahka penanggul penutup parit kayu ke udah rusak nyadi isu besai sereta deka diaduka enggau lengkas, lalu mai penanggul nya ngagai seksyen pekara injinir SMC.

“Kelimpah ari nya, kami deka bejalaika pengawa muai dan kayu kena nentuka palan alai ngelantangka ati tu likun lebuh dilawa mensia mayuh,” ku iya nambah.

Sama bisi iya nya Arkitek Landskap MPS Angela Swin, Mandal Chairman Serakup Kaul Diri Sekaban Kandang Menua Tengah Sarawak Bong Sin Shui enggau Ngu Sung Hua, sekretari Yii Sie Tung, tukang wang Lau Ing Kung sereta ketuai Raban Nembiak Yu Ming Hui.