Projek Sepital Petra Jaya diatu ba renggat nyua tinda ngagai raban peninda ti udah dikemendar
KUCHING: Projek Sepital Petra Jaya diatu ba renggat nyuaka tinda ngagai raban peninda ti udah dikemendar ba renggat pra-penetap nya.
Sapit Menteri Pengerai ll, Datuk Aaron Ago Dagang madahka projek nya diatu ba renggat mansik tinda enggau Surat Setuju Terima ditetapka kena Januari 2021 pengudah hari bulan tinda ditutup 8 Ogos 2020.
“Projek Nembuka Laluh Kereja Sepital Petra Jaya Ti Dilengka dipejalai nengah Tinda Tebuka ari Opis Kereja Raya (JKR) Malaysia. LichaTinda enggau Ngabas Palan Projek udah dipejalaika kena 12 Februari 2019 lalu tinda ditutup kena 24 Julai 2019.
“Taja pan pia, ketegal nadai petinda ke bisi pematut, lalu Opis Menteri Wang Malaysia (MOF) nengah surat kena 26
Ogos 2019 mutuska projek tu ditinda baru nengah Tinda Tebuka (Pra Pematut) ba kompeni ti berejister enggau CIDB sereta bisi kod Bidang B29 (Kereja Ngaga Begunan Pengerai) sereta bisi setipikit Kunteriktor Ngaga Begunan kena bejalaika projek ke enda ditembuka sebedau tu,” ku iya nerang.
Iya madah munyi nya nyaut tanya Dr Kelvin Yii (Mengeri Kuching) ba Aum Dewan Rakyat, di Kuala Lumpur, kemari.
Aaron madahka Projek Sepital Petra Jaya (300 katil) udah dikemendar Unit Perambu Ekonomi, Opis Menteri Besai ((UPE, JPM) ngambi dipejalaika ba baruh Atur Pemansang Malaysia Lumpar Ke-10 (RMK10).
Nitih ku iya, projek nya dipejalaika JKR Malaysia nengah Renggat Begaga berengkah 30 Mei 2013 enggau disadang tembu kena 30 Jun 2018.
Taja pan pia ku iya, berindik ari tikas pemansang projek nya enda ngemuaska ati, JKR Malaysia udah mansutka ‘Notis Penamatan Pengambilan Kerja Kontraktor’ ngagai Zecon Berhad kena 2 Ogos 2018.
Berebak enggau nya, Aaron madahka Projek Klinik Pengerai (Bansa 2) Tabuan Jaya, Kuching udah dikemendarka EPU, JPM ngambi dipejalaika ba baruh Atur Pemansang Malaysia Lumpar Ke-11 (RMK11) ba taun 2016 nengah ungkus projek RM40 juta.
“Projek tu dipejalaika nengah Tinda Tebuka ari JKR Sarawak. Proses tinda projek tu udah dipejalaika ke alai hari bulan tinda ditutup kena 25 Februari 2019.
“Taja pia, Kaunsil Tinda Perintah Besai Sarawak (FCTB) kena 15 Januari 2020 netapka projek nya ditinda baru. Tu laban pengelaun surat pemendar ngelanjarka timpuh sah tinda ari petinda ke mujur,” ku iya.
Ku iya baru, tinda pemadu baru dipelaba kena bulan Ogos 2020, hari bulan Surat Setuju Terima (SST) projek nya disadang begunaka timpuh 30 bulan kereja begaga.
Opis Menteri Pengerai Malaysia enggau Opis Kereja Raya (JKR) sereta ejensi perintah ti bukai seruran bekerejasama rat kena nentuka projek nya bejalai enggau lanchar, ku iya nambah baru.
“Endang udah nyadi aspirasyen opis menteri tu ngambika tetiap projek tembu nitihka timpuh, ungkus enggau standard ti udah ditetapka,” ku iya.