Abang Johari: GPS tetap tegap dibelakang Muhyiddin
GPS enda begilik penemu lalu tetap meri sukung ngagai perintah besai ke diatu ti diiring Tan Sri Muhyiddin Yassin
“
Aku bisi udah nyebut maya ngintu Hari Malaysia di Sibu, GPS dibelakang Tan
”
Sri Muhyiddin Yassin.
Datuk Patinggi Abang Johari Tun Openg
Kepala Menteri
SERIAN: Gabungan Parti Sarawak (GPS) enda begilik penemu lalu tetap meri sukung ngagai perintah besai ke diatu ti diiring Tan Sri Muhyiddin Yassin.
Pekara nya dipadahka Chairman GPS ti mega Kepala Menteri Sarawak, Datuk Patinggi Abang Johari Tun Openg ba sebengkah aum pengarang berita ditu, kemari.
“GPS deka tetap dibelakang (Menteri Besai) Tan Sri Muhyiddin Yassin, perintah ke diatu.
“Aku bisi udah nyebut maya ngintu Hari Malaysia di Sibu, GPS dibelakang Tan Sri Muhyiddin Yassin,” ku iya.
Abang Johari ditanya bekaul enggau berita ti madah Presiden Parti Keadilan Rakyat (PKR) Datuk Seri Anwar Ibrahim bulih sukung
mayuh ari Kaban Parlimen kena numbangka Perikatan Nasional (PN) sereta numbuhka perintah baru lalu nambahka nya GPS dipadah pansut ari PN.
Abang Johari bejaku baru madah diri enda nemu pekara nya sereta enda nemu baka ni Anwar ngitung penyampau Kaban Parlimen ke nyukung iya.
Abang Johari mega bebendar madahka nadai Kaban Parlimen ari GPS nyukung Anwar.
“Aku enda nemu baka ni iya (Datuk Seri Anwar Ibrahim) ngitung nya.
“Nadai .... Semua ketuai parti ditu. Aku enda nemu dini iya (Anwar) bulih (penyampau nya),” ku iya nyaut lebuh ditanya sekalika bisi tauka nadai Kaban Parlimen GPS nitihka Anwar.
Berebak enggau tu lebuh ditanya bakani penemu iya bekaul enggau ulah tauka gaya Anwar, Abang Johari madah nyelai.
“Ba penemu aku iya (Anwar) ‘nyelai’,” ku iya.
Kelimpah ari nya Sapit Kepala Menteri Tan Sri Datuk Amar James Jemut Masing lebuh ditanya bekaul enggau Anwar nya, iya madahka nya semina deka nyaruka runding rayat.
Masing ti mega Presiden Parti Rakyat Sarawak (PRS) bepenemu Anwar enda patut ngereja pekara nya enti ketegal deka nyaruka politik Sabah kelebih agi Pengawa
Bepilih Nengeri Sabah deka dipejalaika.
“Aku enda mereti nama kebuah Anwar baka nya engka nya ketegal politik ke nyadi di Sabah diatu lalu deka nyaruka pengundi (di Sabah) sereta madah kaorang Sarawak enda rinduka Tan Sri Muhyiddin.
“Aku ngasaika enda patut baka nya kelebih agi iya siku orang ti berkaliber, anang bemainka runding rayat baka nya. Aku tekenyit Anwar ngembuan runding baka nya.
“Orang Sarawak chukup tegap, kitai madah nyukung dibelakang Tan Sri Muhyiddin ke penegap, laban pemadu beguna penegap,” ku iya.
Dulu ari nya Abang Johari enggau Masing ngulu Pengerami Ketuai Begulai Enggau Rayat ti diatur ba Dewan Mayuhguna SJK Chung Hua Serian ditu.