Pelilih Menua Mit Siburan diperambu diangkat nyadi Pelilih Menua
SERIAN: Perintah nengeri merambu deka ngangkatka Pelilih Menua Mit Siburan nyadi Pelilih Menua dalam Bagi Menua Serian.
Kepala Menteri Datuk Patinggi Abang Johari Tun Openg madahka, pekara nya benung dipansik.
“Kitai benung mansik bekaul enggau Siburan deka diangkat nyadi pelilih menua penuh.
“Kitai mansik tu ari baruh Opis Sekretari Perintah Nengeri bekaul enggau kemungkinan/on the possibility ngangkatka Pelilih Menua Mit Siburan ngagai Pelilih Menua.
“Kitai deka meda semua pekara bekaul enggau penyampau tubuh lalu pia mega garis entara menua ba kandang endur tu,” ku iya nerang silik pekara nya ba aum pengarang berita.
Dulu ari nya Abang Johari ngulu pengerami Tuai Begulai Enggau Rayat ti diatur ba Dewan Mayuhguna SJK Chung Hua Serian ditu, kemari.
Sama bisi ngulu pengerami nya Sapit Kepala Menteri Tan Sri Datuk Amar James Jemut Masing enggau Datuk Amar Awang Tengah Ali Hassan, Menteri Pelajar, Sains enggau Pansik Teknologi ti mega Kaban Kunsil Nengeri Tebedu Dato Sri Michael Manyin Jawong, Sekretari Perintah Nengeri Datuk Amar Jaul Samion enggau sida ke bukai.
Lebuh bejaku ba pengerami nya, Abang Johari arap bendar Bagi Menua Serian ulih nyadi mengeri ke maju tauka mansang bepelasarka pemansang ke udah sereta benung dipejalaika.
“Kami kabinet enggau pemesai kanan perintah udah meda status projek pemansang Bagi Menua Serian tembu enggau dipejalaika.
“Pemadu beguna iya nya ba peda aku Serian lengkas amat mansang nyadi sebuah nengeri ke mansang baka bisi Kompleks Perintah nyengkaum kereban bukai baka palan konvensyen enggau ke bukai.
“Enggau perambu ti baka tu sereta mengeri Serian dalam pemaik enggau pengelantang, ari baruh siti perabung enggau orang Bidayuh ulih sereta patut beserakup ngemansangka Serian ti tebal agi diuan bansa
Bidayuh,” ku iya.
Dalam jaku pengelalu, Manyin madah dalam aum enggau licha, YAB Kepala Menteri diberi penerang ari ejensi sereta opis perintah bekaul enggau projek pemansang di serata Sarawak lebih agi di Bagi Menua Serian.
Ku Manyin, nya dikena nentuka projek ti udah dikemendar ulih dipejalaika enggau manah sereta tembu nitihka timpuh ke udah ditetapka.
“Entara projek dalam Bagi Menua Serian baka Kompleks Perintah, enti nitihka sida ke bejalaika projek tu dipelaba deka tembu bulan Mei 2021, kebendar patut tembu bulan Februari tu tadi tang tejanggal ketegal COVID-19, lalu ungkus projek RM130 juta.
“Kedua, palan konvensyen udah berengkah digaga urung 5 peratus, ti begunaka ungkus belanja RM80 juta.
“Bekaul enggau bungkur bekal kuasa karan, urung 99.9 peratus Serian udah dibekal kuara karan ari grid. Terima kasih ngagai Menteri Utiliti Dato Sri Dr Stephen Rundi Utom. Lalu pia mega bekal ai udah mungkur urung 90 peratus kandang menua di Serian,” ku iya lebuh ti ngenang entara projek ti dipejalaika ba Bagi Menua Serian.
Manyin madah nya nunjukka perintah nengeri ngamatka pekara ti udah disemaya sereta ukai semaya ai liur baka ti dituduh sekeda orang.