Besaup nyaga pemeresi rampa menua Sibu: Clarence Ting
SIBU: Opis Kaunsil Mengeri Sibu (SMC) enggau peranak menua Sibu patut besaup enggau pangan diri nyaga pemeresi rampa menua.
Berindik ari nya, Chairman SMC Clarence Ting madahka pekara tu ukai semina bepanggai ba SMC aja kena bejalaika pengawa nya, tang mensia mayuh mega patut bela bekunsika tanggungpengawa tu.
“Enti orang majak muai uras lalu SMC ti ngumpul nya, ‘cherita’ tu nadai pengujung. Kitai patut bisi kerejasama enggau pangan diri kena nentuka pemeresi rampa menua kitai.
“Enti palan kitai beresi, kitai enda mudah kena rampit penyakit. Dalam reti jaku ke bukai, pengidup kitai deka lantang sereta bepengerai,” ku iya lebuh bejadika kimpin meresi palan ba Kutien Memorial Park ti diatur Serakup Kutien Sarawak, ditu empai lama.
Berebak enggau nya, ku Ting, pengawa nyaga pemeresi kandang mengeri Sibu deka meri empas ke manah mensia mayuh sereta ulih narit ati bala temuai ari luar.
Senentang ripot pasal SMC enda meresi parit ba palan berumah ditu ti ngujung ampuh bah, Ting madahka peranak ba palan nya enda bejalaika tanggungpengawa diri empu.
“Kebendar iya sida ulih ngaduka pekara tu kediri, kena meresi sereta mutarka penanggul uras ti betunggung ba parit ba luan rumah sida.
“Anang semina ngandalka SMC aja kena bejalaika pengawa ke tengan pemesai nya. Sida ti enda bejalai tanggungpengawa diri taja udah nemu batang kebuah ampuh bah nyadi ba palan sida lebuh hari ujan bangat,” ku iya nyemetak.
Berindik ari tu ku iya, raban apai indai patut nerenakka pemereti ati ba anak sida ngambika nemu guna enggau pemesai reti nyaga pemeresi rampa menua tu sereta enda muai uras ba sebarang alai.
“Manah agi mai bala anak kita enggau ngulu kimpin pengawa meresi tu, kena ngelalau sereta nelebaka sida ngambika enda muai uras ba sebarang alai sereta muai ba endur ke betul,” ku iya nambah.