Peranak rumah panjai Tanjung Penasu nerima bantu ari Ketuai Nembiak PDP
SIBU: Ketuai Nembiak Parti Progresif Demokratik (PDP) Bawang Assan Kunsilor Joshua Ting udah nyuaka bantu ari iya empu ngagai peranak rumah panjai ba Tanjung Penasu, kena Hari Empat minggu nyin tadi.
Bansa bantu ti diagih Ting ngagai peranak rumah panjai iya nya barang perengkaguna ninting hari, nitihka peminta enggau ke guna sida sebedau tu.
“Semua bantu tu deka meri pemaik ngagai 77 pintu ari sekeda rumah panjai dalam kandang bagi menua Tanjung Penasu.
“Bisi lebih ari 100 rumah panjai ba kandang Bawang Assan, tang peminta sida sebedau tu udah lama enda dikeibuh lalu proses pemansang enggau perengkaguna peranak rumah panjai udah lama diketuka.
“Nengah pengawa bejalai ngabas ti mayuh dipejalaika sereta meretika senentang gaya pengidup peranak menua, kami ulih ngasaika pemerinsa enggau penanggul ti ditapi sida lalu deka mantu peranak rumah panjai kena nyungkakka tikas pengidup sida,” ku iya ditu kemari.
Ku Ting, pengudah sepengelama bebulan iya enggau raban ke bukai bejalaika pengawa ngabas rumah panjai ba DUN Bawang Assan, sida nerima timbal ari peranak menua ditu ti ngarapka perintah ulih ngaduka infrastruktur ba genturung pendiau sida, nyengkaum perengkaguna bekal ai enggau elekterik ti udah dipinta sida kenyau ari 10 taun ke udah.
“Nengah pengawa ngabas tu, kami meri terima kasih besai ngagai peranak rumah panjai laban nyendiaka diri nerima sereta muka ati sida, kena bekunsika penanggul ti ditapi dalam pengidup sida ngagai kami.
“Ari perati enggau pengawa ti baka tu udah meri sida pengandal senentang pemansang rumah panjai dudi hari ila,” ku iya baru.
Berindik ari tu, Ting besemaya enggau naka ulih deka ngamatka semaya enggau lengkas ngambika ulih nyungkak pengarap peranak rumah panjai ngagai parti tebal agi iya empu, lalu ukai nyadi pengari rayat ti semina landik bejaku aja.