Bintulu deka bisi ‘Farm In The City’ ngena konsep taman rekreasyen jelu
BINTULU: Bintulu deka bisi zoo ba mengeri enggau taman ekologi ti dikelala enggau nama ‘Farm In The City’ ti ngena konsep taman rekreasyen jelu ba tengah mengeri besai ti sebaka enggau ‘Farm In The City’ di mengeri besai Permai Seri Kembangan Selangor.
Menijar Besai Opis Kaunsil Pemansang Bintulu (BDA) Rodziah Morshidi madah, Seri Kembangan tu ngembuan begunan ke tinggi enggau jalai besai tang ba kandang tanah empat ikar, sida ngaga kampung dalam mengeri besai ti ngengkahka jelu ke ulih dipegai enggau diberi makai sereta ulih dipeda semak.
Ku iya, jelu ke jinak tu enda takut enggau penatai mensia nyadi enggau ngena chara ke sama pemansang projek tu di Taman Tumbina Bintulu ulih nyadi pematak tambah temuai dudi hari ila.
Ku iya nerang, kami udah berandau sentang projek tu kenyau tiga taun nyin tadi enggau kami deka ngenyitka mensia mayuh di Bintulu sentang nya kelebih agi ke bekaul enggau elemen subsidi bayar tama ngagai taman tu.
“Ba keterubah lebuh aku pulai baru nyadi menija besai BDA enggau maya kitai muka laman web ungkup Taman Tumbina, timbal ari mensia mayuh (ngelawa taman tu) betambah manah ba bansa jelu ke bisi enggau ari pemanah ke bukai.
Taja pia, kitai nadai ngembuan pengelandik ngatur jelu bansa nya lalu pengawa kitai pan baka ngelempai baka nya aja.
Nya alai ku iya, nengah bejalaika projek baru tu, kami ngarap nya nyadi pematak tambah ngagai palan tu (Taman Tumbia) enggau tanah pemesai 20 ikar di Taman Tumbia deka diserah ngagai kompeni ke bekaul ngatur lalu kami deka berandau silik sentang ungkus pemansang nya.
“Tu ketegal BDA dalam ngatur Taman Tumbia ti mega begunaka ungkus,” ku iya maya ngemunka projek ngaga ‘Eco Panorama’ ti dikelala nyadi ‘Farm In The City’ di Greens Hotel & Suites ditu kemari.
Sama bisi datai Chairman Eco Panorama Kapitan Dr Simon hong Yu Liing, Direktor
Projek Eco panorama Michael Hii, Pemangku Sapit Menijar Besai BDA Rahim Abdullah,
Penulung Direktor Besai(Servis Korporat) Hasiah Morshidi, Sekretari/ Menija Kanan (Undang) Maimunah Matali, Penulung Menija Besai (Servis Rampa Menua)
Wan Ibrahim Wan Ali, Temenggung Barry Yek, Presiden Dewan Dagang enggau Industri China Bintulu (BCCCI), Yek Siew Liong sereta menija kanan BDA.
Ku iya, Datuk Allan Phoon (Penumbuh ke mega Ketuai Pemesai Eksekutif Farm In The City Seri Kembangan Selangor) udah datai dua kali kitu (Bintulu) enggau iya gaga ati meda gaya taba nya.
“Iya (Datuk Allan) kala ngereja projek ‘Lost World of Tambun’ (Perak), ngepunka projek taman tema, zoo enggau Sunway Lagoon sereta KL Tower (Mini Zoo) nyadi nengah peneleba nya ngayanka iya patut neruska projek tu ba taba nya,” ku iya seraya nambah Kaunsil Direktor BDA mega udah setuju deka ngemendarka tanah tu ngagai kompeni nengah sempekat ti udah diatur ungkup pemansang projek nya.
Ku iya, projek tu deka nyadi siti pematak ngagai Bintulu kelebih agi pengudah COVID-19, mayuh orang bejaku sentang dagang temuai domestik lalu ungkup timpuh dua ngagai tiga taun sida deka meda guna pekara tu.
“Tang aku deka madah ngagai raban kompeni tu, kandang menua Tanjung Batu diatu udah kelalu mayuh mensia enggau jalai sekut maya ujung minggu taja kami udah teleba enggau gaya tu ba ujung minggu tang pekara tu patut diperati silik ngambi diputar nengah kerejasama begulai enggau pemesai ke bisi,” ku iya.
Ku Rodziah madah, aku pechaya enti kitai nguna chara Singapura enggau enda ngemendarka kerita tama ngagai palan rekreasyen tang semina ngemendarka ngena basikal, ‘papan selaju’ ba semanjai jalai taman rekreasyen penanggul tu ulih diputarka.
Ku iya, kami deka meda ke mua sereta berunding silik enggau kompeni tu laban semua bansa jelu kitai di Taman Tumbina deka diserah ngagai sida ngambi diatur.
Iya ngarap projek tu deka nyadika Bintulu manah agi palan endur temuai domestik ngelantangka ati lebih agi maya pengudah COVID-19.