Siti kes baru positif COVID-19 diripotka di Sarawak kemari
KUCHING: Bisi siti kes baru positif COVID-19 diripotka di Sarawak ti bekaul enggau siku indu menua tu, ke ngawa yadi ijin nyual kereban komunikasyen ba palan meli barang di mengeri besai tu.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita kemari madah, nya nyadika penyampai semua kes positif COVID-19 ba Sarawak naka kemari.
“Sehari tu (kemari) bisi siti kes positif COVID-19 ditemu di Pelilih Menua Kuching. Tu nyadika penyampau semua kes positif COVID-19 di Sarawak nambah nyadi 1,056 kes.
“Kes ke-1,056 iya nya siku indu peranak menua tu ti udah beperesa pengerai enggau beperesa COVID-19 laban ti batuk, tabin, sebening pala enggau enda ulih ngemau.
“Kes gawa ba sebuah palan bebeli barang di mengeri besai Kuching nyadi ijin nual kereban komunikasyen,” ku JPBNS, kemari.
Nitihku JPBN kes 1,056 nya beperesa ba sebuah sepital peribit di mengeri besai Kuching kena 23 November 2020 sereta ditemu postif COVID-19 ba hari ke sama.
Kes nadai sejarah mindah ke menua luar tauka ngelawa kandang endur ti berisiko COVID-19 di dalam enggau luar Sarawak, kelimpah ari nadai kontak semak enggau kes positif COVID-19 ti diripotka sebedau tu.
“Kes tu agi dipansik lalu aktiviti nyidi semua kontak semak serumah, ba endur kereja enggau kontak sosial benung chakah dipejalaika. Kes dikategori nyadi kes berampit dalam menua tu,” ku JPBNS seraya madah kes udah dipasuk sereta diperubatka ba Sepital Besai Sarawak (HUS).
Nambahka nya JPBNS madah kemari bisi 10 kes baru udah gerai sereta dikemendarka pansut ari HUS (lapan kes) enggau Sepital Miri (dua kes), ti nyadika penyampau semua ke udah gerai bisi 992 iku tauka 93.94 peratus ari semua kes positif COVID-19 di serata Sarawak.
Pelilih menua Kuching naka kemari agi bestatus mirah, lalu semua penyampau bisi 58 kes berampit dalam menua (pelilih menua Kuching) diripotka dalam timpuh 14 hari ke udah.
Dua pelilih menua bestatus Kuning sereta 37 pelilih menua ke bukai di Sarawak agi dalam status Gadung.
Kemari bisi 25 PUI baru diripotka lalu dua PUI agi nganti pemutus peresa makmal.
Kelimpah ari nya kemari, bisi 434 Person Under Surveillance (PUS) udah ngerejista masuk ba hotel sereta dikuarantin, ti nyadika penyampau semua PUS ba 33 buah hotel enggau SC ukai hotel bisi 3,394 iku.