COVID-19: Dua kes diripotka di Sarawak, Kuching udah ba status Oren

KUCHING: Pelilih Menua Kuching betukar ari status Mirah ngagai Oren enggau semina dua kes positif COVID-19 baru diripotka ba Sarawak, kemari.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah, nya nyadika penyampau semua kes positif COVID-19 di Sarawak nambah nyadi 1,058 kes.

“Sehari tu (Kemari) Pelilih Menua Kuching betukar ari status Mirah ngagai Oren enggau penyampau semua 37 kes berampit diripotka dalam kandang endur tu dalam timpuh 14 hari ke udah. Pelilih Menua Miri enggau Lawas bestatus Kuning sereta 37 buah ke bukai bestatus Gadung.

“Bekaul dua kes positif COVID-19 baru (kemari) ditemu di Sibu. Kes tu iya nya ke-1,057 enggau 1,058 bekaul enggau dua lelaki peranak menua tu ti pulai ari Romania nengah Qatar kena 8 November 2020 sereta datai di Kuala Lumpur kena 9 November.

“Kes tu iya nya sebagi ari pekereja peranak menua Malaysia dalam bidang minyak enggau gis di Romania ti enda ulih pulai sereta enda dibayar gaji. Kes dikategori nyadi kes dirampit COVID19 maya di menua luar,” ku JPBNS.

Nitih ku JPBNS dua kes nya dikuarantin 14 di palan kuarantin maya datai di Kuala Lumpur sereta maya pulai ke Sarawak nengah Padang Bilun Miri seduai mega dikuarantin baru sereta diperesa baru ngena rTPCR sereta pemutus positif COVID-19.

Sebedau nya seduai nadai ngayanka tanda kena rampit COVID-19 sereta diatu dipasuk sereta diperubat ba Sepital Sibu.

Kemari bisi 27 PUI baru diripotka lalu empat PUI nganti pemutus makmal.