Long Atip enggau Long Lenei di Baram kena ampuh bah

MIRI: Dua buah menua Long Atip enggau Long Lenei, Baram udah ampuh bah pagi kemari laban ujan bangat kena Hari Dua tu tadi.

Ketuai Opis Bomba enggau Penyelamat Malaysia (JBPM) Zon 6 Miri, Komisioner Kanan Bomba I Law Poh Kiong madah, ba Long Atip, tikas ai majak niki kelebih agi kandang endur ke baruh.

“Ripot ke diterima naka pukul 7.30 pagi kemari madahka urung 60 peratus kandang Sekolah Kebangsaan (SK) Long Atip ti ampuh bah dipelabaka penalam sekaki.

“Nitihka ripot semua nembiak sekula ba rumah sida empu enggau di Miri,” kau iya ba siti penerang media ditu,kemari.

Berebak enggau nya ba SK Long Lenei, nitihka ripot udah ngampuhka 70 peratus kandang sekula enggau penalam entara lima nyentuk 15 sentimeter.

Taja pia ku Law, naka berita tu ditulis lemai kemari, nadai pengawa mindah udah dipejalaika.