Tuai Rumah ningkilka diri ari PKR, nyemilik PBB
MARUDI: Kaban PKR Pampang Marudi, Michael Biggol Agan 56 taun, udah ningkilka diri ari parti nya ensanus laban nyemilik Pampang PBB Mulu, sereta mandangka sukung iya ngagai Perintah GPS.
Michael Biggol baru dipadu nyadi Tuai Rumah ke pemanjai 20 pintu ba Logan Entasan B, urung 30 km ari ditu.
Pom peminta iya nyadi kaban PBB udah disuaka ngagai Kaban Kunsil Nengeri Mulu ke mega Sapit Speaker Kunsil Nengeri (DUN),Dato Gerawat Gala ti udah nemuai ngagai rumah panjai iya kena pagi Hari Dua tu tadi.
Michael Biggol lebuh dikerandau pengarang berita madah, ngelama tu iya nadai kala nyukung Barisan Nasional tang diatu iya nemu, begulai enggau parti penyakal enda ulih mai projek pemansang laban sida nadai geran MRP.
Sekumbang aku begulai enggau PKR, diatu aku nemu perintah ke diatu endang amat mantu rayat. Ambika chunto, pemansang ditu ke bisi dipeda diatu iya nya asil ari MRP ke diberi MP Baram, Anyi Ngau ti udah meri RM100,000.00.Ngena geran ke diberi nya,kami ulih ngaga rumah panjai kami.
Lebuh ke nemuai nya, Dato Gerawat bisi besemaya deka ngungkupka RM3,000 sepintu ngagai rumah panjai nya, ke alai semua penyampau nya Rm54,000 ngena MRP iya.
Ku Michael Biggol baru, Gerawat mega bisi ngasuh sida minta duit injau ari Kaunsil Pengawa Berumah (HDC) ngambiak bisi dikena sida meli perengka dikena ngaga rumah.
Gerawat mega ngelalau Michael Biggol enggau peranak rumah panjai nya bekerejasama enggau perintah GPS, ngambika mayuh agi pemansang gaga di menua sida.
Bisi ngemataka iya nyuaka pom pemita nyadi kaban PBB iya nya Datuk Robert Laing Anyie,Pemancha Randi Bundan, Tuai Rumah Kiam Ujai ari rumah panjai Logan Entasan A enggau bala bukai.