Palan mansik penyakit berampit berengkah digaga, beroperasyen taun 2024
KUCHING: Palan pemansik penyakit berampit ti dilangkar deka ngena ungkus sepenyampau RM190 juta diperambu deka digaga ba Kota Samarahan.
Pekara tu udah dipadahka Menteri Pelajar, Sains enggau Pansik Teknologi Datuk Amar Micheal Manyin ke madahka, opis menteri iya ngelangkar palan nya digaga ba Kota Samarahan enda jauh ari Sepital Jantung Sarawak (IJN).
Ku iya nyemetak, tu nyata ngayanka pengawa proaktif perintah nengeri ke lalu mega nentuka Sarawak udah besedia deka mutarka sebarang penusah penyakit berampit jemah ila.
“Tu ti udah dipinta Kepala Menteri Datuk Patinggi Abang Johari Tun Openg diterangka aku lebuh ti betemu tengah hari tadi (kemari) lalu nya deka digaga ba Kota Samarahan.
“Kitai deka nentuka taba ti engkeman kena numbuhka palan pemansik tu lalu endur ti engkeman iya nya besepiak enggau sepital jantung.
“Nya alai kitai ngarapka bisi taba (tanah perintah nengeri) ba kandang menua nya ungkup tuju tu,” ku iya ba pengerami nangguhka Aum Antarabansa bekaul Teknologi enggau Sains Inovasyen ungkup Pemansik sereta Pelajar (InnoSTRE) Edisyen Khas 2020 ti diatur UiTM Sarawak ditu, kemari.
Ku Manyin madah, opis menteri iya udah madah ngagai Opis Menteri Pelajar Malaysia lalu nerima pemendar ari Institut Pemansik Perubat Malaysia kena madahka pelin perintah nengeri nya.
“Sida madahka nadai penanggul deka numbuhka palan pemansik nya.
“Kitai mega udah ngerundingka pekara tu lalu dua iku saintis begulai enggau aku dalam (pelin) palan pemansik tu lalu sida ngembuan peneleba dalam bidang tu,” ku iya nambah.
Nitih ku iya, palan pemansik penyakit berampit tu nyangka berengkah digaga ba taun baru lalu deka berengkah beoperasyen 2024.
“Kitai enda ngatur tu kediri tang ngaul semua universiti di Sarawak enggau Malaysia nyengkaum raban profesional ti deka nyadi palan endur sida bejalaika pansik ti bekaul,” ku iya.
Kena Hari Tiga, Abang Johari madahka pengawa nirika palan nya beungkus RM190 juta lalu nyangka deka berengkah digaga ba taun 2021 ari baruh Langgur Pemansang Malaysia Lumpar ke-12 (RMK-12).
Dulu agi ari nya, Penyanding Penemu ti mega Rektor UiTM Sarawak, Prof Dato Dr Jamil Hamali madahka, aum InnoSTRE udah nyapai batang tuju nya diatur ti udah ngempung lebih 80 keretas kereja ti dibantaika.
Ku iya nerang, batang tuju aum tu kena pesereta ari menua tu enggau antarabansa ari mayuh macham bidang akademik sereta industri dalam bekunsika penemu sereta asil pansik ti pemadu baru ke bekaul enggau COVID-19.
Nitih ku iya, tu iya nya aum hibrid keterubah di Malaysia ti nyendiaka pelasar nengah chara 'online' enggau fizikal dalam berandauka inovasyen ti pemadu baru dalam pengerembai sains enggau teknologi kena mutarka penguji pandemik COVID-19.