Saup nembiak redak ngerejista masuk Program Imunisasyen COVID-19 Menua
Ngambika peranak di menua pesisir enggau ulu entigis sama tau nerima vaksin COVID-19 dikena nyaga diri enggau orang ke ngelingi: Dr Chin
“Rayat Malaysia ke diau di Sarawak tau ngerejista ngambi imunisasyen COVID-19 nengah aplikasyan MySejahtera versyen ” ke pemadu baru. Dr Chin Zin Hing Opis Pengerai Nengeri Sarawak
KUCHING: Opis Pengerai Nengeri Sarawak minta ketuai komuniti kelebih agi ba kandang menua pesisir enggau ulu entigis, mantu nembiak redak sida iya ngerejista masuk Program Imunisasyen COVID-19 Menua Renggat Nengeri Sarawak.
Direktor opis nya Dr Chin Zin Hing nengah sebengkah penerang madah, nya ngambika peranak ba kandang menua pesisir enggau ulu entigis sama nerima vaksin COVID-19 kena nyaga diri enggau orang ke ngelingi.
Iya madah, rejista ngambi vaksin COVID-19 nya mega ulih digaga nengah aplikasyen MySejahtera versyen ke pemadu baru.
“Rayat Malaysia ke diau di Sarawak tau ngerejista ngambi imunisasyen COVID-19 nengah aplikasyan MySejahtera versyen ke pemadu baru.
“Ngagai sida ke bisi apai indai dalam raban orang lunggar umur ke nadai telefon pintar, tau ngerejista ngarika apai indai nya bepanggai ba sida.
“Lalu ngagai sida ke nadai akaun MySejahtera, tau ngerejista ba klinik pengerai perintah ke semak.
“Peranak ke diau ba menua pesisir enggau menua ulu entigis tau ngerejista ba Opis Pelilih Menua nengah Ketuai Komuniti baka Ketuai Genturung Pendiau (KK), Tuai Rumah (TR) enggau Komiti Pengelikun enggau Pemansang Genturung Pendiau (JKKK),” ku iya.
Berebak enggau tu, iya ngelalau mensia mayuh ngambika lengkas agi download aplikasyen MySejahtera kena ngemuntangka proses pengerejista meri imunisasyen COVID-19 tauka masuk Program Imunisasyen COVID-19 tu, kelimpah ari tau terus ngelawa klinik pengerai perintah ke semak.
Ku iya, ngagai mensia mayuh ke bisi akaun MySejahtera, chara ‘push notification’ deka diberi kena ngingatka sida pasal nerima imunisasyen COVID-19.
Setipikit imunisasyen digital deka diberi automatik lebuh penerima udah bulih dos ke chukup.
“Ngagai sida ke nadai akaun MySejahtera, dikena ngingatka sida iya nya digaga ngena kad semaya betemu sereta mega deka dikangau ngena telefon.
“Lalu kad imunisasyen deka diberi ngagai penerima pengudah nerima dos imunisasyen ke chukup tauka ke udah ditetapka,” ku iya.
Nambahka nya, iya mega ngelalau mensia mayuh ngambika enda mudah tekuing runding enggau penerang ti enda betul pasal vaksin COVID-19.
Enti deka nemu penerang ke betul ku Dr Chin, patut terus betanya ngagai raban Opis Pengerai.
Sebedau program meri imunisasyen tu berengkah ku iya, Opis Pengerai Nengeri Sarawak udah nyendiaka lumur ‘hotline’ kena ngemuntangka mensia mayuh betanya sereta bulih sebarang penerang silik bekaul enggau program nya nyengkaum vaksin ke dikena.
Lumur ‘hotline’ Opis Pengerai Nengeri Sarawak ke tau ditelefon iya nya 082473275/ 473276/ 473304/ 473320/ 473345 lalu beoperasyen deka berengkah kena 25 Februari 2021.
“Mensia mayuh mega dilalau ngambika enda mudah tekuing runding enggau penerang ke enda betul pasal vaksin COVID-19 enggau patut betanya ngagai raban Opis Pengerai nyema begunaka penerang ti betul.
“Opis Pengerai Nengeri Sarawak minta kerejasama semua orang ngambika seruran nitihka lalau enggau langgur meri imunisasyen ti deka dipadah nengah aplikasyen MySejahtera ila, nyengkaum ari raban Media.
“Nya alai, kena nentuka program meri imunisasyen tu diatur enggau mujur, Opis Pengerai Nengeri Sarawak sekali agi ngarapka mensia mayuh lengkas download aplikasyen MySejahtera sereta ngelawa enda ngira bagi klinik pengerai ke semak endur ngerejista,” ku iya.