Sarawak ngerikod 219 kes positif baru, dua pemati kemari

KUCHING: Sarawak ngerikodka 219 kes positif baru COVID-19 enggau dua kes pemati ketegal rampit COVID-19, kemari.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah, nya ngujungka penyampau semua kes positif COVID-19 nambah nyadi 8,869 kes enggau semua 78 kes pemati.

“Sehari tu (kemari) bisi 219 kes positif baru COVID-19 ditemu di Sarawak.

“Lalu pelilih menua ba nengeri tu ke ngerikodka kes baru iya nya Pelilih Menua Sibu (80), Kapit (26), Bintulu (25), Kuching (18), Meradong (17), Miri (12), Samarahan (11), Serian (10), Selangau (8), Sri Aman (5), Saratok (3), Kanowit (1), Sarikei (1), Bukit Mabong (1) enggau Betong (1). Tu ngujungka penyampau semua kes nambah nyadi 8,869 kes.

“Sehari tu (kemari) mega bisi dua kes pemati baru ketegal rampit COVID-19 diripotka ba Pelilih Menua Sibu. Tu ngujungka penyampau semua kes pemati ketegal rampitCOVID-19 nambah nyadi 78 iku,” ku JPBNS, kemari.

Bekaul enggau kes pemati baru, kes pemati ke-77 iya nya kes ke-7,675 siku indu peranak menua (Sarawak) beumur 74 taun ti diperubatka ba Sepital Sibu laban bisi tanda tabin, batuk enggau sendat seput.

Kes diperesa peresa rTPCR kena 18 Februari 2021 sereta asil ditemu positif kena 19 Februari 2021, tikas pengerai kes mega majak enda manah sereta ditetapka udah nadai kena 24 Februari 2021.

Kes ke-77 bisi ko-morbid penyakit darah tinggi enggau kemi manis.

Nambahka nya kes pemati ke-78 iya nya kes ke-4,334 siku lelaki peranak menua (Sarawak) beumur 90 taun ti udah diperubat ba Sepital Sibu maya meresa kontak semak ngena peresa rT-PCR COVID-19 sereta ditemu positif.

Gaya pengerai kes majak enda manah sereta ditetapka udah nadai kena 25 Februari 2021.

Kes-78 bisi ko-morbid penyakit darah tinggi, gout, acute hepatitis enggau sejarah strok ti begunaka bantu enggau sukung aktivisi asas dalam pengidup tiap hari.

“Komiti Mutarka Penusah Ngenyit Nengeri Sarawak ngenataika penyinu ati ngagai sida ke sebilik enggau kes,” ku JPBNS.

Kelimpah ari nya, JPBNS ngeripotka kemari bisi 248 kes baru udah gerai sereta dikemendarka pansut ari Sepital Sibu (149), Sepital Miri (43), PKRC Sepital Kapit (27), H Sepital Besai Sarawak (25), Sepital Sarikei (3) enggau PKRC Sepital Sri Aman (1).

“Tu ngujungka penyampau semua kes positif COVID-19 ke udah gerai sereta dikemendarka pansut ari sepital nambah nyadi 6,484 iku tauka 73.11 peratus ari penyampau semua kes COVID-19 ba Sarawak,” ku JPBNS.

Kemari bisi 267 PUI baru diripotka enggau lima PUI ti agi nganti pemutus peresa makmal.