Masing: Pengawa bepilih dipelaba tau diatur maya emergensi
KUCHING: Presiden Parti Rakyat Sarawak (PRS) Tan Sri Datuk Amar James Jemut Masing melabaka pengawa bepilih tau diatur maya emergensi.
Nitih ku iya, nya berindik ari pekara dipadahka Yang Di-Pertuan Al-Sultan Abdullah Ri’ayatuddin Al-Mustafa Billah Shah, ke alai Parlimen diatu tau baum maya timpuh emergensi.
“Engka enggau aum Parlimen diatur baru maya emergensi, nya tau mulaika baru ngagai demokrasi.
“Tu mega reti iya pengawa bepilih besai mega tau diatur,” ku iya madah ngagai Borneo Post, kemari.
Masing ti mega Sapit Kepala Menteri enggau Menteri Infrastruktur enggau Pemansang Palan Penyangkai Kapal taja pia, ngelalau rayat ngambika terus bejejimat.
“Tang dalam kitai bisi pengaga ati meda prinsip demokrasi pulai baru, kitai anang enda ingat nama kebuah emergensi tu ditetapka. Nya dikena nagang COVID19 berampit.
“Enti Parlimen deka baum lalu pengawa bepilih besai diatur ba maya timpuh emergensi, SOP (prosedur operasyen standard) pengerai ti terit patut dititihka parti politik lalu atur Opis Pengawa Bepilih (SPR) mega patut dipejalaika enggau terit maya pengawa bepilih kena nagang COVID-19 berampit,” ku iya.
Ku iya, enti semua orang politik nitihka lalau enggau atur Opis Menteri Pengerai enggau SPR, nadai kebuah Parlimen enda tau baum lalu pengawa bepilih besai enda tau diatur kelebih agi diatu laban vaksin udah bisi.
Iya meri penerang nya lebuh dipinta ngenang pasal ripot kemari, ke alai Yang di-Pertuan Agong Al-Sultan Abdullah Ri’ayatuddin AlMustafa Billah Shah meri penemu, Parlimen tau baum maya timpuh emergensi ti dipejalaika Seri Paduka ba siti timpuh ke patut bepelasarka lalau Menteri Besai.
Pengelola Bijaya Diraja Istana Negara Datuk Ahmad Fadil Shamsuddin madah pekara nya ditulis dalam subperenggan 14(1)(b) Ordinan Emergensi (Kuasa-Kuasa Perlu) 2021 ti madah Parlimen patut ditesau, ‘diprorog’ enggau direrak Seri Paduka ba siti hari bulan tauka timpuh ke patut nitihka lalau Menteri Besai.