ADUN, MP Sarawak dipelaba nerima vaksin ba renggat keterubah Program Imunisasyen COVID-19 dilancharka
KUCHING: Semua pengari rayat di Sarawak nyengkaum Kaban Kunsil Nengeri enggau Kaban Parlimen dipelaba nerima vaksin Pfizer BioNTech ba renggat keterubah Program Imunisasyen COVID-19 dilancharka kena 27 Februari tu.
Nitihka notis ti dikeluarka Direktor Opis Pengerai Nengeri Dr Chin Zin Hing ngagai Speaker DUN Sarawak, pengari rayat ari Kuching, Samarahan, Serian, Sri Aman, Betong, Sarikei, Sibu, Mukah enggau Kapit deka dituchuk berengkah ari 27 Februari nyentuk 4 Mac.
“ADUN enggau Kaban Parlimen nengeri tau ngulihka vaksinasyen nya ba mingguketerubah iya nya entara 27 Februari enggau 4 Mac ba palan meri vaksin ke semak enggau sida.
“Taja pia, pengari rayat ari Bintulu, Miri enggau Limbang deka diberi vaksin baa minggu kedua, iya nya ari 5 nyentuk 11 Mac,” ku Dr Chin ti nerima notis kena 24 Februari.
Berebak enggau nya, Dr Chin lebuh dirandau Borneo Post kemari madah, vaksinasyen nya endang program volunteer taja pan pengari rayat dikategorika Opis Menteri Pengerai nyadi terabai menua.
Taja pia ku Dr Chin, bekaul enggau notis pemadah nya, iya meri terima kasih ngagai sukung ari semua pengari rayat awakka ngambi vaksinisasyen nya.
Nitihka notis ti dikeluarkan Sekretari DUN nya, Pele Peter Tinggom mega madahka 82 pengari rayat nengeri deka dipasukka enggau nerima imunisasyen.
Ku notis nya, Opis Pengerai Nengeri deka bejaku enggau pengari rayat bekaul engagu proses COVID-19.
Notis kena 24 Februari nya mega meransang pengari rayat meri kerejasama dalam program vaksinasyen.
Di Sarawak, bisi 82 ADUN enggau 31 iku Kaban Parlimen.