Berita ti madahka Parlimen tau baum maya emergensi patut disambut manah
KUCHING: Semua kaban parlimen (MP) ari kedua-dua piak penyakal enggau perintah, patut nyambut manah berita ti madahka Parlimen tau baum sekumbang timpuh emergensi.
Kaban Parlimen Bandar Kuching Dr Kelvin Yii madah, Parlimen beguna amat kena ngenegapka agi parlimen ti lebih nyata, tau dikearap sereta nyelai setipak enggau situasyen lebuh ke napi penyakit diatu.
“Nya mega deka mantu nambahka pengandal sereta ulih nerima chara ti dipejalaika perintah kena napi pandemik kelebih agi lebuh bejalaika pengawa meri vaksin.
“Nya alai, semua kaban parlimen sekalika ari sepiak penyakal tauka perintah mesti nyambut manah berita ti dipadahka nya laban kitai enda tau enda ngetanka tanggungpengawa parlimen enggau kuasa ti nadai tatak kelebih ba maya ke amat patut,” ku iya nengah penerang berita ditu, kemari.
Kena Hari Tiga, Yang di-Pertuan Agong Al-Sultan Abdullah Ri’ayatuddin AlMustafa Billah Shah madahka Parlimen tau baum sekumbang timpuh emergensi berengkah ari siti hari bulan ti diasaika Seri Paduka patut berindik ari jaku tangkan Menteri Besai.
Pengelola Bijaya Diraja Istana Negara Datuk Ahmad
Fadil Shamsuddin madahka pekara nya bisi dalam subgenteran 14(1)(b) Ordinan Emergensi (Kuasa-Kuasa Ke Patut) 2021 ti madaka Parlimen mesti ditesau, ‘diprorog’ sereta direrak ngagai siti hari bulan ti diasaika Seri Paduka patut berindik ari jaku tangkan Menteri Besai.
Dr Yii ke mega Penulung Sekretari DAP Sarawak madah,nengah berita ti dipadahka Yang di-Pertuan Agong itu, iya ngarapka perintah deka nesau baru Parlimen pun Mac tu.
“Nya ngambika kitai ulih bejalaika pengawa sereta enda semina nejuka chara perintah kena napi COVID-19, tang ngambika kitai ulih mantaika bemacham penanggul ke ditapi ba sitak kami.
“Kelimpah ari nya mega meransang perintah netapka kuing perambu baka ni sida ngerembaika ekonomi diatu ngambi pulai ke pemaik rayat,” ku iya.