Kepala Menteri entara orang keterubah nerima vaksin COVID-19 di Sarawak
KUCHING: Kepala Menteri Datuk Patinggi Abang Johari Tun Openg entara orang ti keterubah nerima tuchuk vaksin COVID-19 Program Imunisasi COVID-19 Nengeri Sarawak, kemari.
Abang Johari ti datai urung pukul 3 lemai ba Klinik Pengerai Petra Jaya ditu, nerima tuchuk dos keterubah vaksin bansa Pfizer-BioNTech.
Klinik Pengerai Petra Jaya entara Palan Endur Meri Vaksin (PPV) program imunisasi ba nengeri tu.
Bisi nyempulang iya, Sapit Kepala Menteri ti mega Chairman Komiti Mutarka Penusah Ngenyit Nengeri Sarawak Datuk Amar Douglas Uggah Embas, Sapit Kepala Menteri Datuk Amar Awang Tengah Ali Hasan, Menteri Kaunsil Kandang Menua enggau Pengawa Berumah Dato Sri Dr Sim Kui Hian, enggau Direktor Opis Pengerai Nengeri Sarawak Dr Chin Zin Hing.
Sama nerima tuchuk dos keterubah enggau nyadi entara pemadu dulu nerima vaksin dalam program imuninasi tu iya nya Awang Tengah lalu ditangkanka Dr Sim enggau Dr Chin.
Lalu sehari tu urung pukul 10 pagi, Abang Johari deka bejadi Program Imunisasi COVID-19 Negeri Sarawak ti diatur ba Stadium Perpaduan, Petra Jaya ditu.
Kena 24 Februari tu tadi, bisi 23,400 dos vaksin COVID-19 bansa Pfizer-BioNTech datai ba Sarawak urung pukul 6.22 lemai ba Padang Bilun Antarabansa Kuching (LTAK) ti dibai ngena penerebai khas Syarikat Penerebai Raya Airways Sdn Bhd ulih deriba bilun Kapten Ezil Azlan Ahmad Muniran.
Tim (kumpulan) keterubah vaksin COVID-19 tu deka diberi ngagai raban terabai menua ba renggat keterubah program vaksinasi ba nengeri tu.
Renggat kedua deka mungkur raban berisiko tinggi enggau orang tuai beumur 60 taun ke atas dipelaba berengkah ba bulan April.
Ditangkan renggat ketiga program imunisasi iya nya diberi ngagai individu beumur 18 taun ke atas.
Urung 2.2 juta rayat nengeri tu ti beumur 18 taun ke ulih tauka patut nerima vaksin COVID-19.
Ba nengeri tu bisi 56 PPV ungkup program imunisasi ti nyengkaum Sepital Bau, Klinik Pengerai (KK) Singai, Sepital Lundu, KK Stungkor, KK Batu Kawa, KK Jalan Masjid, KK Petra Jaya, KK Sentosa, KK Tanah Puteh, Sepital Besai Sarawak, Pusat Jantung, KK Kota Samarahan, KK Asajaya, Sepital Simunjan, KK Indai enggau Anak Simunjan Bandar, Sepital Serian, KK Indai enggau Anak Serian, KK Tebakang enggau KK Tarat.
Palan bukai nyengkaum Sepital Sri Aman, KK Sri Aman, KK Lubok Antu, Sepital Betong, KK Mid Layar, KK Pusa, Sepital Saratok, Sepital Sarikei, KK Sarikei, KK Bintangor, KK Julau, KK Pakan, Hospital Kapit, KK Kapit, KK Song, Hospital Sibu, KK Jalan Lanang, KK Sibu Jaya, KK Selangau, Sepital Kanowit, Sepital Daro enggau Sepital Mukah.
Kelimpah ari nya KK Indai enggau Anak Mukah, KK Belaga, KK Sg Asap, Sepital Bintulu, KK Jepak, KK Tatau, Sepital Marudi, Sepital Miri, KK Bandar Miri, KK Batu Niah, Sepital Lawas, KK Lawas enggau Sepital Limbang mega nyangkaum nyadi PPV program tu.